NENGSEKHI 33 - AMÜSA BAIBEL (BSI)

Nengse Khi

¹ Nührü Amüsarü atümungnü Abüdongba-nü tu nguchicho, hütsü nengdang akünyangnü züdeing; Abi yocho nyirü atümungnü Abi seing.

² Abüdongba khyang tbenglah bi nengse jüng, abi te tbenglah bi khi thsaang.

³ Abi te khi asi khüdu thsaang, akünyangnü züde tbenglah sihthsa tiinü thsaang.

⁴ Abüdongba yu tsü yuje ko Abi nguchi apüm alongdinung.

⁵ Abüdongba-nü tu Amüsa ko yuje hütsü müire; Abi amüthrehba amüinü alimih jengko.

⁶ Abüdongba yuzeng khu ning külüpcho, nyü, chonu ko chenghiti Abi yunü külüpcho.

⁷ Abinü kihdi apüm müdüm khüdula khyübülungcho; Abinü kihjü asoh alih yonglang khangtire.

⁸ Abüdongba drüng, limih apüm! Abi dhiching, liküpnü!

⁹ Abinü chode, limih thricho; Yuzeng jüde lüpcho chürocho.

¹⁰ Abüdongba-nü yanglihti alümcho jinyangjüre; arüh lümchung hitsinung lanü Abinü yatire.

¹¹ Ta Abi lümchung müchangkapü lire; Abi lümcho shang apüm la linung.

¹² Khüiba yucho Tsingrang Abüdongba liro, arüh akünyangnung; nyitsarü sürü Abi yo thsanung throchehcho, arüh akünyangnung!

¹³ Abüdongba-nü ninglangnü dhingchahchüre; ko amüi tsurü atümung ngure.

¹⁴ Abi lichahnü, Abinü limih chah lirü apüm chah dhingre.

¹⁵ Abinü arüh lümlong thrijüre, ko arühnü nguchicho lüpcho müdhere.

¹⁶ Yangthsarünü rothsarü thrungchonü akoh müngure; Rothsarü khüdunü abi suzehchonü akoh müngure.

¹⁷ Akoh nengdang khata kuri akhyüchah mühle, arüh rezehchonü mükhümchonung.

¹⁸ Abüdongba-nü Abi te nyirü ko sürünü Abi amüthrehba amüila longlangro arüh dhingyehre.

¹⁹ Abinü asünunglanü arüh khümchore; ko yangkonglanü arüh khümcho yohpüre.

²⁰ Ihrünü Abüdongba chah alongdi yohpüre; Abi Ihsa tsungtirü ko atrorü.

²¹ Abi nengla Ihsa künyangre, Abi Amüsa nengla Ihsanü longlangre.

²² Abüdongba, Nü chah ihrü alongdi yohpüde, Nü amüthrehba amüi ihrü te lisohng.