NENGSEKHI 32 - AMÜSA BAIBEL (BSI)

Mülang Nyengchoba ko Pehba

¹ Sürü münyi mülang pehcho, sürü thsamehcho pehjücho arüh akünyangnung.

² Sü khyang Abüdongba-nü mümülangjüro ko sü lasih la thsüyohchüba müliro abi akünyangnung.

³ Ihnü I münyi münyengchode, mükhyang trachonü Ih khecho.

⁴ Ama atsingse Nühnü Ih khingchicho, Abüdongba, müyü adhsanü yingdhsa hekungcho kyo, I re khüdupinü kingkapehcho.

⁵ Hütsüde Ihnü I münyi Nüte nyengchocho; Ihnü I thsamehcho Nüte mürang. Nüte nyengchonung Ihnü dhrongchehcho, ko Nühnü I münyi apüm pehjücho.

⁶ Hütsüeko Nü yocho nyirü atümung nüh dhsütahde Nüte kihchibae; Chongcha kihloh dhi rode, hütsünü arüh müchihnung.

⁷ Nüh I tsikehchah; Nühnü dhsangthsi lanü Ih khümchonung. Nü akangcheh züde Ihnü khi thsanung, tunüo Nühnü I tsungtire.

⁸ Abüdongba-nü yore, “Ihnü nüte nü wünung lang yonung, Ihnü nüte thülanung ko thsüchinung.

⁹ Kuri mahkhang Gadu khüi ayo ko lakhümnü rahsehro hütsü kyo tüdoh.”

¹⁰ Amütsarü chongchanung, ta Abüdongba chah longlangrü Abi amüthrehba amüinü tsungtire.

¹¹ Nührü Amüsarüti, Abüdongba-nü tu nguchicho hütsü nengdang künyang ko longphieng. Nührü Abi yocho nyirü, akünyangnü züdeing!