NENGSEKHI 31 - AMÜSA BAIBEL (BSI)

Tsingrangba Chah Longlangnung Kihchicho

¹ Abüdongba, atsungti yangchi Ih Nüh yang rore; Ih ashah tükhyüsoh. Nüh Amüsaba Tsingrang; Ih khümchoung, Ihnü kihchire.

² Ite nyijüng! Ade Ih khümchoung! Ih tsungtinung I tsikehchah Nüh thsaang; I khümchonung Nüh I khümrü thsaang.

³ Nüh I tsikehchah ko I khümrü; Nü anyengchocho kyo Ih nyahng ko nüng.

⁴ I khyang thsapüjüba zeng lanü Ih khümchoung; dhsürüla Ih tsikehsohng.

⁵ Nü kheh la I nbü jüre; Nühnü Ih khümchonung, Abüdongba; Nüh longlangchehba Tsingrang.

⁶ Arahkheh tsingrang mübürüti Nühnü thrünyire, ta Ihlü Nü chah longlangre.

⁷ Nüh müthrehba amüi nengdang Ih künyangnung ko longphinung. Tunüo Nühnü I chongcha ngule; ko I dhsangthsi müdhele.

⁸ Nühnü arorüh kheh la Ih müjü; Nühnü I jing thangchi jükehsohko.

⁹ Ite yanglilüm, Abüdongba, tunüo Ih adhsangthsi la lile; dira trachonü I nahküp bümre; Ih kyahsehpehko.

¹⁰ Longrichonü Ih kingkako, ko trachonü I kang khisohko. Dhsangthsichonü I tase müzeh; I rühlungrü mii kungpehko.

¹¹ I rorüti, ko alathsa I kurümrütinü Ih mülangjü bichire; I shangrünü Ih drüre; yanglongla Ih ngude arühnü rang tsire.

¹² Ih sopehcho kyo, atümungnü Ih nbüchüpehko; Ih apehcho kohro khüdu kyo lile.

¹³ Arorühti rang chotacho Ihnü yuchire; Dhsürünü Ih mükangtipüle. Ih nyüm arühnü lümchung chungre, I müpsehnung arah külüpre.

¹⁴ Ta I alongdi Nü chah lile, O Abüdongba; Nüh I Tsingrang.

¹⁵ I bekhyah Nü kheh la lile; I rorüti ko I dhsümthserü khehlanü Ih khümchoung.

¹⁶ Nü dikehrü chah müi dhing; Nüh amüthrehba amüila Ih khümchoung.

¹⁷ Ihnü Nüte züdere, Abüdongba; Ih ashah tükyüsoh. Amütsarü ashah khyüsohng; asülih yang arüh naying züdusohng.

¹⁸ Amüthsehrü ko mülahmüshirü sürünü amüsarü mülangjü choro hiri arahkhehrü atümung be hümtijüng.

¹⁹ Nü jengreng drürü khyang yohpüjüba kohro atsa tsü khüta anyemüyangnung! Nüh khütoh-i atsa atümungnü müdhele, Nü chah longlangrü khüta aringnung müli khümcho liro.

²⁰ Nühnü nyitsarü rah lanü arüh rang khümcho yohpüre; arüh rorüh müthsamünyü lanü Nühnü arüh tsikehsoh yohpüre.

²¹ Abüdongba seing! Ih mükangtipü dhsakehjüde, Abi anyemüyang amüi khütoh-i Ite ngucho!

²² Abi tenü Ih pehkopü drünü lümcho. Ta Ihnü arüku nengdang züdede Abinü I züdecho yuchicho.

²³ Nührü amüsarütinü Abüdongba müing. Abüdongba-nü amüsarü tsungtire, ta amüthsehrü arüh aleng Abinü khingchire.

²⁴ Rezehng, müci mülahng, Abüdongba chah longlangrü apüm.