NENGSEKHI 28 - AMÜSA BAIBEL (BSI)

Arüku Shulüm Kihchicho

¹ O Abüdongba, Ih tsungtibong, Ihnü Nüh dsire. I züdecho nyijüng. Nühnü mülalingkhang, asü limih lang züdurü yola Ih zehnung.

² Ihnü arüku nengdang züdede ko Nü Amüsa Amübükuh lahpi I kheh dhimüsude Ite nyijüng.

³ Akhürahrü Amütsa nguchirü, sürü yu anyiyah ta arüh lasih lalü thrünyiro, arüh yola Ih tümülangjü.

⁴ Arüh nguchi ngang ko arüh amütsa nguchi shulüm arüh khingching. Arüh nguchi nengdang khingchieng; arüh nguchi aleng jüng!

⁵ Abüdongba-nü tu nguchicho mahkhang Abinü tu külüpcho arühnü mükhichire; hütsünü Abinü arüh khingchinung, ko lede nengdang arüh changjünung.

⁶ Abüdongba khyang anengse jüng; arüku shulüm züdecho Abinü yuchiko.

⁷ Abüdongba-nü Ih tsungtire ko khümre; Ihnü Abi chah longlangre. Abinü Ih trore ko Ih künyangsohre; Ihnü akünyang khinü Abi senung.

⁸ Abüdongba-nü Abi müyurü tsungtire; Abinü throchehcho yangthsarü Abinü khümre ko khümchore.

⁹ Nü müyurü khümchoung, Abüdongba; ko Nü müyurüti müwajüng. Nüh arüh san-nyahrü thsaang, ko müchangkapü arüh xüküm.