NENGSEKHI 27 - AMÜSA BAIBEL (BSI)

Anengse Dangkhidangnang

¹ Abüdongba tsü I atsingse ko I akangcheh; Ihnü süsü müdrünung. Abüdongba-nü dhsürü apüm lanü Ih tsungtire; Ihnü khodesü müdrünung.

² Amütsarünü Ih dhsiti kyüsehnung müküpde arüh müthikehre ko khülure.

³ Rothsarü atümungnü Ih mükangtinye, Ihnü müdrünung; Arorühnü Ih betinye, Ihnü mütozah Tsingrangba chah longlangnung.

⁴ Ihnü Abüdongba te lang khüdu nengdang kihchiko; Ihnü lang khüdu du khyünyüre: Abüdongba kuh la I kang ayung linung, Abi tsacho shulüm nyemüyangnung, ko Abi anyahba shulüm kihchinung.

⁵ Dhsangthside Abinü Ih tsikehsohnung; Abinü amübükuh la Ih khümcho yohpünung ko lung athseng chah Ih tsikehsohnung.

⁶ Hütsünü I mükang liba arorühti michah akoh ngunung. Amübükuh la akünyangnü züde kangmübü jünung; Ihnü khi thsanung, Ihnü Abüdongba nengsenung.

⁷ Abüdongba, Ihnü dside nyieng, yanglilüm ko Ite laling!

⁸ “Rung ko mübüng” pü yode, “Ih ronung, Abüdongba” pü Ihnü lalingcho;

⁹ Ite Nü romih türangkhu! Ite zii tüchüro; Nü dikehrü ximüla tütsisoh. Nüh I trorü thsacho; Ih tüpehjü, Ih tüthrüchahchübeh, O Tsingrang, I khümchobong.

¹⁰ Iu ko I tpanü Ih thrüchahchüpehnung kohle, ta Abüdongba-nü Ih xükümnung.

¹¹ Abüdongba, tu nguchisohnyüro, Ite doung, ko lang tsala Ih nüng, tunüo I münyehrü khütango lile.

¹² I rorüh sürünü arahkheh ko adrübanü Ih bede, Ih tüpehjü.

¹³ Hiba akangla Ihnü Abüdongba atsaba tsü ngunungthsa linungepü Ihnü müdhele.

¹⁴ Abüdongba chah longlang. Rezehng ko lasih zieng. Abüdongba chah longlang.