NENGSEKHI 25 - AMÜSA BAIBEL (BSI)

Anyahba ko Atsungtiba Shulüm Akihchiba

¹ O Abüdongba, Nüh yang I akihchiba hirore;

² I Tsingrang, Nü chah Ihnü longlangre. Amükoh ashahkhyü lanü Ih khümchoung; I rorüh I michah tüthsasoh.

³ Nü nyümrü münyehrü chah khu, Nü chah longlangrü süsü amükoh müngure.

⁴ O Abüdongba, Nü lang Ite doung; arüh tsü I khyang müdhesohng;

⁵ Nü yuje langla linung Ite doung; tunüo Ih khümchobong Nüh I Tsingrang. Ihnü lede Nü chah longlangre.

⁶ O Abüdongba, Nühnü papadenü ngusohba müthrehba amüi ko yanglilüm lümchehng.

⁷ I zade thsamehcho ko amünyi mülang pehjüng. Nüh müthrehba amüi ko atsala, Abüdongba, Ih lümchehng.

⁸ Tunüo Abüdongba tsü Amüsaba ko atsa, Abinü münyirü te arüh tsehnung lang thongure.

⁹ Abinü alonglümrü athsalangla nüre ko arüh te Abi lümlong dore.

¹⁰ Abi azengtacho ko yuzeng bichirü atümung Abinü longlangba ko amüila nüre.

¹¹ Abüdongba, Nü anyengchocho yohpüng, ko I münyi mülang pehjüng, tunüo I münyi khütango lile.

¹² Abüdongba te nyirütinü arüh tsehnung lang Abi chahnü nyichore.

¹³ Arüh lede müwanung ko arüh tsuzarünü alih tsü khyünung.

¹⁴ Sürünü Abüdongba yocho nyiro arüh Abi shangrü lile ko Abinü arüh te Abi azengtacho drengdrengsohre.

¹⁵ Abüdongba chah shikhe mükhu arüku nengdang dhingre, ko Abinü dhsürü lanü Ih reechore.

¹⁶ Abüdongba, Ih yang ximülaang ko Ite yanglilüm, tunüo Ih nayingre ko sumüzeh.

¹⁷ Alümxü lanü Ih kyahshangsohng ko chongcha apüm lanü Ih khümchoung.

¹⁸ I awah ko aroto lümdhing ko I münyiti mülang pehjüng.

¹⁹ I rorüh khütoi liro dhing; arühnü khütoi Ih thrünyiro dhing.

²⁰ Ih tsungtieng ko Ih khümchoung; Amükoh lanü Ih khümchoung, Ih Nüh yang tsikehnung rore.

²¹ Atsaba ko yuje chobanü Ih rikijüng, tunüo Ihnü Nü chah longlangre.

²² O Tsingrang, arüh dhsangthsi apüm lanü Nü müyurü Israelrü khümchoung!