NENGSEKHI 24 - AMÜSA BAIBEL (BSI)

Yangthsarü Amülah

¹ Liküp ko hütsüla zehba apüm Abüdongba yo; Limih ko hütsüchah liba apüm Abi yo.

² Abinü hütsü kih asoh michah alih yonglang külüpcho, ko kihjü asoh la hütsü müdongkehcho.

³ Abüdongba zonglang sü tuwünung? Abi Amüsa Amübükuh la sü züdunung?

⁴ Sürü nguchi ko lümlong amüsa liro, sünü kyothri mümübüro mahkhang arahkheh anyengchoba müyohpüro.

⁵ Abüdongba-nü arüh müwajünung ko khümchonung; Tsingrangba-nü arüh achomükeh sobhonung.

⁶ Hitari nyitsarünü Tsingrangba yang rore, arühnü Jakob Tsingrang jingte rore.

⁷ Tbükhüm müza rehthrung. Jümü kukhang khangthrung, ko yangthsarü amülah tsü züronung.

⁸ Yangthsaba amülah tsü süo? Abi tsü Abüdongba, re azeh ko Akohba, Abüdongba tsü khatala Akohbong.

⁹ Tbükhüm müza rehthrung, Jümü kukhang khangthrung, ko yangthsaba amülah tsü züronung.

¹⁰ Yangthsarü amülah tsü süo? Akohbong Abüdongba Abi ahechi yangthsaba!