NENGSEKHI 19 - AMÜSA BAIBEL (BSI)

Athricho la Tsingrangba Ahechi

¹ Ningnü Tsingrangba ahechi mishajüre! Hinü Abi khehthsi khohcheh ngusohre.

² Nyümong müipinü atu khyang müdhesohre; romang khüdunü akhüu nengdang yore.

³ Achocho mahkhang yu tusü mübichi, tu yuvasü müyuchi;

⁴ ta arüh yuva limih apümlang würe ko hütsü limih achangchi yuchire. Tsingrangba-nü nyü khyang ninglang kuh khüdu thsa lile;

⁵ hütsü kukangbong kyo anyangnyü chürore, shajarü khüdu shangmülitanung longphicho kyo.

⁶ Ningjing khüulangnü dikehpü khüulang achangka chii würe. Abi adhsa lanü tunüsü mürangcheh.

Abüdongba Yuzeng

⁷ Abüdongba yuzeng tsü adekheng; hütsünü tase asi jüre. Abüdongba amülaba tsü longlangnung, lümlong mülirü khyang hütsü jüre.

⁸ Abüdongba yuzeng tsü yuje, ko hütsü nyirü künyangre. Abüdongba amülaba tsü yuje, ko lasih khyang anyichehba jüre.

⁹ Abüdongba mübüba tsü atsa; hütsü müchangkanung. Abüdongba yukhaba tsü yuje, arüh lede atsa.

¹⁰ Arüh tsü atahchehcho hon tenü alaa amükhyahnung; arüh thsakukih amüdhseng tenü anyiyahba.

¹¹ Ih Nü kulibong khyang hütsünü lümlong jüre; hütsüri bichicho ngang Ih jiyücho.

¹² Sünüsü palu thsamehcho müngure; Abüdongba, rang liba thsamehcho lanü Ih khümchoung!

¹³ Lümkhung münyi shitpahcho lanüsü Ih khümchoung; I michah hütsüri tüyangthsasoh. Hütsükhang Ih adekheng kangnung ko amünyi lanü nyüje kangnung.

¹⁴ Iyu ko I lümchoti Nühnü khyüchochehba kangsohng, O Abüdongba, I tsikehsing ko khümchobong!