NENGSEKHI 18 - AMÜSA BAIBEL (BSI)

David Akoh Khi

¹ Ihnü Nüh khüta müiro, Abüdongba! Nüh I phikhümrü lile.

² Abüdongba tsü I tsungtising; Abi I roshengvi akhümkhüm. I Tsingrang tsü I tsungtising, ko Abi te Ih khümcho lile. Tsung kyo Abinü Ih nyingtire; Abinü Ih tsungtire ko khümcho yohpüre.

³ Ihnü Abüdongba dsire, ko Abinü arorüh khehlanü Ih khümchore. Abüdongba seing.

⁴ Asüba dhsürü I mükang licho; thsangnyangjüba kihlohnü Ih mülümticho.

⁵ Asüba dhsürü I mükang licho, ko kongnü I nengdang zeng thsapücho.

⁶ I chongchala Abüdongba te dsicho; arüku nengdang Ihnü I Tsingrang te dsicho. Abi amübükuh lanü Abinü I yuva yuchicho; atroba nengdang Ihnü züdecho Abinü yuchicho.

⁷ Hütsüde alimihnü dhridhri shühchicho; azongti müdongkehji mühachicho ko zingchicho, tunüo Abi zichürocho.

⁸ Abi nabong khilanü mikhu chürosohcho, ko abe lanü atrüpba mihmüle ko michüh arührüp chürosohcho.

⁹ Abinü ning rohrüp-pü Ajing pohki nyükhi anyahla jürocho.

¹⁰ Abinü aqo kehba kanglungrü michah mong tsicho.

¹¹ Apu jangjang amarürahnü müshüticho; kih jeng zehba nyükhi achehlingnü Abi müshüticho.

¹² Abi bete ningmüla lanü shurülung ko michang mülakeh chüro nyükhi amarürah tsü khakhucho.

¹³ Hütsüde Abüdongba-nü ninglangnü ningkicho, ko Amichahba Akohba yuva yuchicho.

¹⁴ Abinü tbüdeng kyacho ko arorühti tsishosohcho; ningmülachonü Abinü arüh tsishosohcho.

¹⁵ Nühnü nü rorüti yübüde, Abüdongba, ko Nü zichüro arüh chah khongkehjüde, kihjü jongnah ngusohcho ko alimih müdongkehji khangthrucho.

¹⁶ Abüdongba-nü ninglangnü khyüchahchü Ih ramehcho; ko kih asoh lanü Ih tphahchehcho.

¹⁷ Re azeh I rorüti ko I thrünyirü khehlanü Abinü Ih khümchocho, tunüo arüh I tenü re azeh-u licho.

¹⁸ Ih chongcha lide arühnü Ih becho, ta Abüdongba-nü Ih khümchocho.

¹⁹ Dhsürüla Abinü Ih trocho; Abinü Ih khümchocho, tunüo Abinü Ite künyang licho.

²⁰ Abüdongba-nü Ih jiyüre, tunüo Ihnü athsalang nguchire; Abinü Ih müwajüre, tunüo Ih achomükeh.

²¹ Abüdongba yuzeng Ihnü nyiko; I Tsingrang tenü Ih müximüla.

²² Ihnü Abi yuzeng apüm nyiko; Ihnü Abi amülaba mühnyi mühle.

²³ Ih amülang mühle, ko amütsa münguchirepü Abinü müdhele.

²⁴ Ihnü athsalang nguchichonü Abinü Ih jiyüre, Ih achomükeh pü Abinü müdhele.

²⁵ O Abüdongba, Nüte yuje chorü te Nühnü yuje chore; adekhengrü te Nüh khütang atsa lile.

²⁶ Amüsarü te Nüh amüsa, ta akhürahrü te Nüh arorüh.

²⁷ Akünarü Nühnü khümchore, ta akükhingrü Nühnü tphahchore.

²⁸ Abüdongba, I khyang atsingse jüng; Nühnü amarürah kishosohre.

²⁹ I rorüti mahnung suhre jüng ko arüh nyüm akoh ngunung zii jüng.

³⁰ Hiba Tsingrang, Abi nguchiti khüta apisa! Abi yu khüta alonglangnung! Abi chah tsikehnung yangchirü nengdang, Abi tsü tsung lile.

³¹ Abüdongba du tsü Tsingrang khung; Tsingrangba du tsü Ihsa phikhümrü.

³² Abi tsü I rezehsohba Tsingrang; ko I lang khümcho nüre.

³³ Abinü I jing shümüshü jing kyo kangsohre; Abinü azongla Ih khümcho yohpüre.

³⁴ Chitanung Abinü Ite dore, hütsünü Ihnü singthsalu aziuba tsü bichichehre.

³⁵ O Abüdongba, Nühnü Ih tsungtire ko khümchore; Nühnü xükümchonü Ih arangcheh kangsohko, ko Nü ziinü Ih khümcho lile.

³⁶ Rah yohpücho lanü Nühnü Ih khümchoko ko Ih khodesü mükhülu.

³⁷ Ihnü I rorüti iichi rangre; arüh müchangsohde münyehlire.

³⁸ Ihnü arüh chitsure ko arüh müsurochehre; arüh I jingte khülure.

³⁹ Khatanung nengdang suhre ko I rorüti michah akoh jüre.

⁴⁰ Nühnü I rorüh I tenü tsishosohre; I thrünyirü Ihnü changsohre.

⁴¹ Arühnü arüku nengdang züdere, ta sünüsü arüh mükhümchore; arühnü Abüdongba te züdere, ta Abinü mülalingre.

⁴² Nyübongnü fotsiba asongsong kangnungthsa arüh münohnahjüre. Yanglongla chongbong kyo Ihnü arüh dhrümnahre.

⁴³ Anyümrü chahnü Nühnü Ih khümchopü yuchoti michah yangthsasohcho; Ihnü mütsüpba müyurüti I mono kangko.

⁴⁴ Shuparünü I jingte mükhukehre; I yuva yuchide Iyu nyire.

⁴⁵ Arüh thrungcho lü-pehko ko roshengvi lanü dhridhri rore.

⁴⁶ Abüdongba akang lile! I phikhümbong seing! I khümchobong Tsingrang mülahcho sobhoung.

⁴⁷ I rorüti michah akoh jüre; yuchoti Abinü I pohki rahseh yohpüjüre ko arorüh khehlanü Ih khümchore.

⁴⁸ O Abüdongba, arorühti michah Nühnü I khyang akoh jüre ko adrünung nyitsarü tenü Ih khümchore.

⁴⁹ Hütsünü yuchoti yola Ihnü Nüh sere; Ihnü Nü nengsekhi thsare.

⁵⁰ Tsingrangba-nü Abi yangthsaba khyang akoh arangcheh jüre; Abinü throchehcho David ko abi trah te, Abinü müthrehba amüi ngusohre.