NENGSEKHI 17 - AMÜSA BAIBEL (BSI)

Achomükehrü Dangkhidangnang

¹ O Abüdongba, yuje nengdang I kihchicho nyieng; arüku nengdang I züde nyieng! I dangkhidangnangcho nyijüng.

² Nühnü Ih phikhüm yukhanung, tunüo Ih yuje-epü Nühnü müdhele.

³ Nühnü I lasih müdhele. Nühnü aromang Ih xodhingcho; Nühnü Ih longi müchehdhingko ko I chah amünyi tu müngu.

⁴ Ihnü aparü kyo amütsa müchore; Ihnü Nü yuzeng nyiko ko shühkhatohba münguchi.

⁵ Nü langla Ihnü lede tsehre ko khodesü hütsülanü mütsi.

⁶ Ihnü kihchire, O Tsingrang, tunüo Nühnü Ite lalingre; hütsüeko I yanglang pieng ko Iyu nyieng.

⁷ Nü anyemüyangnung amüi mishaang ko ihrü khümchoung; Nütelü ihrü rorüh chahnü ihrü khümcho lile.

⁸ Nühnü Nü nahtse khümchocho kyo Ih khümchoung; Nü qo pohki Ih rangpüng,

⁹ akhürahrünü mahcho lanü Ih khümchoung; tunüo arorühnü Ih mükangtiko.

¹⁰ Arüh chah achomang mühle ko kükhing chore.

¹¹ Thsatsa tsala Ih khülusohnung, adelü Ih ximülacho apümlang mükangtipü jüm yale.

¹² Arüh kihkhünying roh-i, Ih rehzangzangnung jüm yale.

¹³ Rung, Abüdongba, I rorüti nyüm ko arüh kohng. Nü nohshengnü amütsarü khehlanü Ih khümchoung;

¹⁴ hiba akangla lüpcho mürurü khehlanü Ih khümchoung. Nühnü arüh khyang zahkehpüjüba achongcha apümnü arüh khingching; arüh tsurüti nengdang kükyüpü adesü arüh tsurüti tsurü khyangsü nying yohpüjüng!

¹⁵ Ta Ihnülü Nüh ngunung, tunüo Ihnü amüthsalang tu münguchi; ko Ih jesude, Nü licho akünyangnü Ih jengnung.