NENGSEKHI 16 - AMÜSA BAIBEL (BSI)

Longlangnung Kihchicho

¹ Ih khümchoung, O Tsingrang; Nü chah Ih tsikehre.

² Ihnü Abüdongba te yore, “Nüh I Büdongba; I licho atsa apüm Nü chahnü lile.”

³ Abüdongba chah longlangba nyitsarü khüta akhacheh! Arüh yola linung tsü I alongphi adiu.

⁴ Sünü apa tsingrangti yang tsohkhutaro, abürü michah chongcha khütang hirore. Arüh kangmübü jübala Ih müzehnung; Ihnü arüh tsingrang mümübünung.

⁵ Abüdongba, I licho apümnü Nüh du, I dhsütah apüm Nühnü chixire; I kang Nü kheh la zehle.

⁶ I khyang jüba jiyü khüta anyemüyangnung; arüh khüta atsa!

⁷ Ihnü Abüdongba sere, tunüo Abinü Ih nüre, ko aromang I lümlongnü Ih müzahsohre.

⁸ Ite Abüdongba licho Ihnü lede müdhele; Abi Ih amünyeh lile, tunüsü Ih müshüchicheh.

⁹ Hütsünü Ihnü sere ko künyangre, ko Ih khümcho lile,

¹⁰ tunüo Nühnü Ih asülanü khümchoko ko sü, Nühnü müiro abi hiba asü limih khyang müpehjünung.

¹¹ Nühnü akang lang Ite thongunung; Nüh lichonü Ih akünyangnü jengre ko lede nengdang I khyang akünyang hirojüre.