NENGSEKHI 148 - AMÜSA BAIBEL (BSI)

Tsingrangba Senung Liküp Dsire

¹ Abüdongba seing! Nührü amilang lirütinü ninglanglih lanü Abi seing.

² Abi riwürüti atümung, ninglangrü, Abi rothsarüti atümungnü Abi seing.

³ Abi seing, chonu ko nyü; Abi seing, avisa chenghiti.

⁴ Amungthriba ningti, ko ning munglang kihnü Abi seing.

⁵ Arüh atümungnü Abüdongba neng sesohng! Abinü yuzengjücho ko arüh thricho;

⁶ Abi yuzeng khu arüh palu müdümla lede nengdang yohpücho, ko arühnü yocho mühnyinung mükoh.

⁷ Alih lanü, kihkangdi ko kihjü asohti;

⁸ ningmüla ko shurü, müdhrang ko nyükhi ko Abi yochonyiba nyübong, apümnü Abüdongba seing.

⁹ Azongti ko akhangti, singsih dongti ko mürongti;

¹⁰ akangba ko rangshu, chiitsiba ko uza, kanglungrü atümungnü Abi seing.

¹¹ Yangthsarüti ko yuchoti, yangthsarü tsurü ko yangthsathsarü,

¹² dhrezarü ko lazarü, ashirü ko azarünü mii Abi seing.

¹³ Arüh atümungnü Abüdongba neng sesohng! Abi neng aparü atümung tenü adiuba; Abi ahechi ning ko alih tenü amichahba.

¹⁴ Abi müyurü atümungnü Abi senungthsa, Abinü khütang müiba, Israel tsurüti. Abinü Abi yu rezeh kangsohre. Abüdongba seing!