NENGSEKHI 147 - AMÜSA BAIBEL (BSI)

Akohba Tsingrang Seba

¹ Abüdongba seing! Ihsa Tsingrang te nengsekhi thsanung tsü atsa; Abi senung tsü akünyangnung ko athsalang.

² Abüdongba-nü Jerusalem külüpchire; Abinü yangtsirü nüli rore.

³ Abinü lasih dhsa lirü kyangjüre ko arüh madhsa rümjüre.

⁴ Abinü chenghiti khütoinang khichehko, ko arüh müipi anengnü dsire.

⁵ Ihsa Abüdongba arangcheh ko akohba; Abi lümlong mükidhingcheh.

⁶ Abinü alonglümrü dhimüsure, ta amütsarü alih chah kengkeh nyehre.

⁷ Abüdongba te mübü khi thsaang; Tbenglah bi Ihsa Tsingrang te khi thsaang.

⁸ Abinü ningchah nyükhi khyangjüre; Abinü alih khyang tsing rosohre ko azongchah za chisohre.

⁹ Abinü kanglungrü khyang tsuyongba jüre ko khüyahla zati khyang arüh khongde atsunung jüre.

¹⁰ Abi akünyang tsü rezeh kuri chah, mahkhang rezeh rothsarü chah mah;

¹¹ ta Abinü Abi dhichirüti chah künyangre, müthrehba amüila longlangrüti chah künyangre.

¹² Abüdongba seing, O Jerusalem! Nü Tsingrang seing, O Zion!

¹³ Abinü nührü tbükhüm khümkhüm yohpüre; Abinü nührü müyurü müwajüre.

¹⁴ Abinü nührü lurü khümcho yohpüre ko fürü atsaubanü nührü chixire.

¹⁵ Abinü alih khyang yuzeng jüre, ko Abinü tu yoro hütsü zah nguchire.

¹⁶ Abinü shunbühshü kyo müdhrang sühsohre ko lihwü kyo ii pohsohre.

¹⁷ Abinü shurü lihza kyo müthehre; Abinü müthehba arüsahkünang tsü sünüsü mürangre!

¹⁸ Hütsüde Abinü yuzeng jüre, ko ii tsü zünahre; Abinü nyübong müthehre ko kih pohsohre.

¹⁹ Abinü müyurü khyang Abi yuzi, Abi athülaba ko Israel khyang yuzeng jüre.

²⁰ Abinü yucho parü nengdang hi münguchi; arühnü Abi yuzeng mümüdhe. Abüdongba seing!