NENGSEKHI 146 - AMÜSA BAIBEL (BSI)

Akhümchorü Tsingrangba Seba

¹ Abüdongba seing! Abüdongba seing, I nbü!

² I akangli ayung Abi senung; akangli ayung Ihnü I Tsingrang te khi thsanung.

³ Nyitsarü langnürü chah tülonglang; nyitsarü sünüsü nüh mükhümchocheh.

⁴ Arüh khode sonang, arüh alih kangre; hütsü nyümong arüh lümchung apüm changkare.

⁵ Sü Jakob Tsingrang-nü tronung liro ko Abüdongba abi Tsingrang,

⁶ ning alih ko kihdi ko hütsüla libati apüm thribong chah ngakeh liro, abi akünyangnung. Abinü lede anyengchocho yohpüre;

⁷ Abinü nyüpmüsehrü khüm yukhare ko yangsehrü khyang atsunung jüre.

⁸ Abüdongba-nü arangyohrü müthehre ko nahtohrü ngusohre. Abinü ngahsehlirü khamüsure; Abinü Amüsarü müire.

⁹ Abinü Ihsa lih la liba shirü tsungtire; Abinü chomirü ko mürürü rükure; ta amütsarü lümchung thsangnyangjüre.

¹⁰ Abüdongba tsü achangka müli yangthsaba. O Zion, nührü Tsingrang-nü müchangkapü yangthsanung. Abüdongba seing!