NENGSEKHI 142 - AMÜSA BAIBEL (BSI)

Arüku Nengdang Akihchiba

¹ Abüdongba te Ihnü arüku nengdang züdecho; Ihnü Abi te kihchicho.

² Ihnü Abi yang I longmüsü apüm hicho; I dhsangthsi apüm Abi te yocho.

³ I alongdi müli kangde, Ihnü tu nguchinung Abinü müdhele. Ih tsehba langla tsü, I rorünü rang zeng thsapüjüle.

⁴ Ihnü I mükang dhingde, I trorü süsü mülicho Ihnü ngucho, Ih tsungtinung süsü mülicho. Sünüsü Ih müxükümcho.

⁵ Abüdongba, Nüte arüku nengdang züdere; Abüdongba Nüh I tsungtirü; I kang la dhsütahba apümnü Nüh lile.

⁶ Ihnü arüku shulüm züdecho nyieng, tunüo Ih awahla shohjo lile. Arorüh khehlanü Ih khümchoung; arüh I nengdang rezehrale.

⁷ Akhangti lanü Ih lehchehjüng; Ite tsacho nengdang, Nü nyitsarü shimükhongchola Ihnü Nü neng senung.