NENGSEKHI 140 - AMÜSA BAIBEL (BSI)

Tsungtinung Akihchiba

¹ Abüdongba, amütsarü tenü Ih khümchoung; Shüh khatohrü tenü Ih khümcho yohpüng.

² Arühnü lede rah amütsa du dore, ko lede yübütanung du külüpre.

³ Arüh müle tsü mürü müyüh kyole; arüh beküp mürüditsa müyüh kyole.

⁴ Abüdongba, amütsarü tase lanü Ih khümchoung; ko Ih khülusohnung müküprü shüh khatohrü chahnü Ih khümcho yohpüng.

⁵ Amüthsehrünü I khyang zeng thsajüko; arühnü zeng thsapüjüle ko langla Ih xohsohnung zeng khyangpüjüle.

⁶ Ihnü Abüdongba te yore, “Nüh I Tsingrang.” Abüdongba, I züdecho nyieng!

⁷ Amichahba, I Tsingrang, I khümchorü, Nühnü khatala Ih tsungticho.

⁸ Abüdongba, amütsarünü khyünyücho tütikehsoh; arüh rah akoh tüngusoh.

⁹ I rorüh akoh tüngusoh; Ih nyüm arüh rah arühbürü chah mükhakehsohng.

¹⁰ Arüh chah michüh adhsa longkehsohng; arüh shukuh la dhrümyohsohng ko khodesü tüchürosoh.

¹¹ Arahkheh la bürü thsüyohchürü akoh tüngusoh; amütsanü shühkhatohrü kohsohng ko arüh changsohng.

¹² Abüdongba, Nühnü ailümrü khümre ko aikyahrü athsalang khümrepü Ihnü müdhele.

¹³ Amüsarünü yuje Nüh senung; arüh Nüte linung.