NENGSEKHI 138 - AMÜSA BAIBEL (BSI)

Nengse Jüba Akihchiba

¹ Abüdongba, I lasih apümnü Ihnü Nüh sere; tsingrangti bete Ihnü Nü nengsekhi thsare.

² Nü Amüsa Amübükuh lahpi pipü, mükhukeh Nü nengsere, tunüo Nüh müthrehba amüi ko longlangba lile, tunüo Nühnü Nü neng ko Nü yuzengti tsü amichahbaepü ngusohko.

³ Ihnü Nüh dside Nühnü lalingcho; Nü renü Ih rezehsohcho.

⁴ Abüdongba, limih la yangthsarü atümungnü Nüh senung, tunüo arühnü Nü anyengchoba yuchiko.

⁵ Nü nguchi ko Nü ahechi arangcheh nengdang arühnü khi thsanung.

⁶ Nüh amichahbala linye, Nühnü apohkila lirü xükümre, ko amüthsehrünü Nü tenü rangnung mükoh.

⁷ Chongchanü Ih mükangtide, Nühnü Ih khümcho yohpüre. Nühnü zichüro liba I rorüh nyümre ko Nü tasenü Ih khümchore.

⁸ Nühnü anyengchocho apüm nguchinung; Abüdongba, Nü amüi achangka mühle. Nühnü dikehcho nguchi tsü thüm.