NENGSEKHI 135 - AMÜSA BAIBEL (BSI)

Nengse Khi

¹ Abüdongba seing! Abi neng seing, nührü Abüdongba dikehrüti,

² nührü Abüdongba kuh la, Ihsa Tsingrang Amübükuh la yarüti.

³ Abüdongba seing, tunüo Abi atsa; Abi nengsekhi thsaang, tunüo Abi achomang.

⁴ Abinü apu nengdang Jakob, ko Israelrü apu yo thsanung throchehko.

⁵ Ihsa Abüdongba tsü amülah ko tsingrangti atümung tenü adiubaepü Ihnü müdhele.

⁶ Ninglang ko limih chah, kih la ko alih yonglang Abinü tu lümro hütsü nguchire.

⁷ Abinü alih changka lanü nyükhi hirore; Abinü tsingchi külüpre ko Abinü nyübongkhi lanü nyübong hirore.

⁸ Ijip la Abinü nyitsarü ko kanglungrü anyüding aukhuba müpsehcho.

⁹ Hütsüla yangthsaba ko abi thsazirüti khingchinung thsayahiya ko anyemüyangnung nguchicho.

¹⁰ Abinü yanglih adrong thsangnyangjücho ko yangthsarü adrong müpsehcho:

¹¹ Amor yangthsaba Sihon, Bashan yangthsaba Og, ko Kanan la yangthsarü atümung.

¹² Abinü arüh lih Abi nyitsarü khyang jücho; Abinü hütsüri Israelrü khyang jücho.

¹³ Abüdongba, Nüh Tsingrangepü lede sobhonung; Shang apüm la Nüh lümkehnung.

¹⁴ Abüdongba-nü anyitsarüti khümnung; Abinü Abi dikehrüti chomangnung.

¹⁵ Yucho parü tsingrangti tsü hon ko taripinü külüpcho; Arüh nyitsarü khehnü külüpcho.

¹⁶ Arüh be kehle ta müchocheh, nahtse kehle ta müngu.

¹⁷ Arüh nangku kehle ta müyuchi; arühnü sah chichinungsü mükoh.

¹⁸ Hütsüri külüprü ko hütsürichah yudsirü atümung, arühnü külüpba tsü kyo kangsohng!

¹⁹ Israelrü, nührünü Abüdongba seing; nührü bebürütinü Abi seing!

²⁰ Levirüti, nührünü Abüdongba seing; nührü Abi mübürütinü Abi seing!

²¹ Zion la ko Abi kuh Jerusalem la, Abi seing! Abüdongba seing!