NENGSEKHI 132 - AMÜSA BAIBEL (BSI)

Amübü Kuh Seba

¹ Abüdongba, David ko abinü dhsangthsi hitoi rangchocho hi tünbüchü.

² Abüdongba, abinü Nüh, akohba Jakob Tsingrang te tu yuchüm nyengchocho hütsü lümchehng.

³ “Ihnü kuh müyangchinung ko chongnonglang müwünung;

⁴ Ihnü Abüdongba khyang alichah khüdu, akohba Jakob Tsingrang khyang kuh khüdu müjüde;

⁵ Ihnü mükyahshangnung mahkhang müyüpnung.”

⁶ Bethlehem la ihrünü Azengtacho Singdi khüdu nengdang yuchicho, ko hütsü Jearim ngah la ngucho.

⁷ Ihrünü yocho, “Ihsanü Abüdongba kulang wünung; Ihsanü Abi pümji te mübünung.”

⁸ Abüdongba, Nü tase adüzü Azengtacho Singdi te, amübükuh yang rung ko hila lede lieng.

⁹ Nü bebürüti khyang lede athsalang nguchisohng; Nü nyitsarütinü akünyangnü züdesohng.

¹⁰ Nühnü Nü dikehrü David te yuchüm khüdu nyengchoko; Abüdongba, Nühnü throchehcho yangthsaba tüpehjü.

¹¹ Nühnü David te yuchüm ko anyengchocho Nühnü mülulinung: “Ihnü Nü tsurü khüdu yangthsaba kangsohnung, ko Nü khanglang abinü yangthsanung.

¹² Nü tsurütinü Ite nyengchotacho ko Ihnü arüh khyang yuzengjücho yohpükhang, arüh tsurü chungmülita nü khanglang yangthsanung.”

¹³ Abüdongba-nü Zion throchehko; Abinü hütsü Abi kuh kangnyüre:

¹⁴ “Hila Ih lede linung; hila Ihnü yangthsanyüre.

¹⁵ Ihnü Zion khyang dhsütah apüm chixinung; hütsüla ailümrü khyang tsuyongba desahnung.

¹⁶ Ihnü bebürüti arüh nguchicho apüm la müwajünung, ko anyitsarütinü akünyangnü khithsa züdenung.

¹⁷ Hila David trah lanü yangthsarü amülah khüdu chürosohnung; hila Ihnü throchehcho yangthsaba riki yohpünung.

¹⁸ Ihnü abi rorüti ashah khyüsohnung, ta abi yanglih müwasohnung ko hechisohnung.”