NENGSEKHI 119 - AMÜSA BAIBEL (BSI)

Abüdongba Yuzeng

¹ Sürü akang achomükeh liro, sürünü Abüdongba yuzeng la liro arüh akünyangnung.

² Sürünü Abi yuzeng bichiro, sürünü lasih apümnü Abi te nyiro, arüh akünyangnung.

³ Arühnü khodesü amüthsalang münguchire; arühnü Abüdongba langla tsehre.

⁴ Abüdongba, Nühnü ihrü khyang Nü yuzengjücho ko hütsüri yochonyi bichinung yocho.

⁵ Nühnü thülachoti yuje cho bichinung Ihnü khütang lümre.

⁶ Ihnü Nü yuzeng apüm bichikhang, Ih ashah mükhyünung.

⁷ Ihnü Nüh yuje yukhaba nyichode, I lasih amüsanü Nü neng senung.

⁸ Ihnü Nü yuzeng bichinung; Khodesü Ih tüpehjü.

Yuzeng Yochonyiba

⁹ Dhrezarü khüdunü khüta abi akang müsacheh linung? Nü yuzeng bichichonü.

¹⁰ I lasih apümnü Nüh dikehnung müküpre; Nü yuzeng lanü Ih za tülisoh.

¹¹ Ihnü Nü yuzeng I lasih la yohpüre, hütsü dunü Ihnü Nüh nyüm amünyi müshitpahnung.

¹² Ihnü Nüh sere, O Abüdongba; Ite Nü yuzeng doung.

¹³ Nühnü jücho yuzeng apüm Ihnü züde sobhonung.

¹⁴ Kuthsi khütang licho tenü Nü yuzeng bichinungla Ih künyangre.

¹⁵ Nü athülaba Ihnü lümdhingre; Nü adoba Ihnü müchehdhingre.

¹⁶ Nü yuzeng la Ih künyangre; Nü yuzeng Ihnü münbüchünung.

Yuzeng la Akünyang

¹⁷ Nü adoba bichi linungthsa, Nü dikehrü te tsa bichieng.

¹⁸ Nü yuzeng la anyemüyangnung yuje ngunungthsa I nah khangthrujüng.

¹⁹ Ih azachah nengdang hiba limih la lile; I tenü Nü yuzeng türang.

²⁰ Lümtohchonü I long dhridhrire; Ihnü Nü yukhaba shikhe apüm la müdhenyüre.

²¹ Nühnü amüthsehrü khatare; Nü yuzeng mühnyirüti chokehcholare.

²² Nyüpmüseh ko müthsamünyüba lanü, Ih lehchehng, tunüo Ihnü Nü yuzeng yohpüko.

²³ Yangthsarütinü shibülung Ih nyüm rah külüpre, ta Ih Nü adoba yangchinung.

²⁴ Nü athülabanü I khyang akünyang jüre, arüh I trorü lile.

Yuzeng Bichinung Adhrongchehba

²⁵ Alih la Ih khülu lile; Nü anyengchocho kyo Ih khamüsung.

²⁶ I nguchi apüm Ihnü nyengchocho, ko Nühnü Ite lalingcho; Ite Nü yuzeng doung.

²⁷ Nü yuzeng nyichehnung Ih troung, ko Ihnü Nü anyemüyang nguchi lümdhingnung.

²⁸ Alongrinü Ih hehthsako; Nü anyengchocho kyo I re zehsohng.

²⁹ Lang thrümehnung lanü Ih nülieng, ko chomangnü Nü yuzeng Ite doung.

³⁰ Ihnü yochonyinung throchehko; Ihnü Nü yukhabala lasih jüre.

³¹ Ihnü Nü athülaba yohpüko, Abüdongba; Ih ashah tükhyüsoh.

³² Ihnü longphiseh Nü yuzeng bichinung, tunüo Nühnü anyichehba alaa jünung.

Anyichehnung Nengdang Akihchiba

³³ Ite doung, Abüdongba, Nü yuzeng adüzü, ko Ihnü lede hütsüri bichinung.

³⁴ Nü yuzeng yohpünungthsa, Ite changnah young, I lasih apümnü Ihnü bichinung.

³⁵ Nü yuzengte yochonyi Ih yohpüjüng, tunüo hütsüla I akünyang ngure.

³⁶ Alirü kangnung tenü, Nü yuzeng nyinung mürusohng.

³⁷ Amii mülibala müci jünung lanü Ih nülieng; Nü anyengchocho kyo Ite tsaang.

³⁸ Nüte nyirü te Nühnü nyengchocho kyo, Ih Nü dikehrü te Nü anyengchocho yohpüng.

³⁹ Ihnü drüba nyüpmüseh lanü Ih khümchoung; Nü yukhaba khütoh-i anyemüyangnung!

⁴⁰ Ihnü Nü yuzengti bichinyüre; I khyang akang asi jüng, tunüo Nüh Amüsaba.

Yuzeng la Alongdi

⁴¹ Nühnü khütoh-i Ih müirünang Ite ngusohng, Abüdongba, ko Nü anyengchocho kyo Ih khümchoung.

⁴² Hütsüpü du I nyüpmüsehrü te Ihnü lalingchehnung, tunüo Ihnü Nüyula longlangre.

⁴³ Lede Ih yuje du chosohng, tunüo Nü yukhabala Ihnü longdire.

⁴⁴ Ihnü lede Nü yuzeng achangka müli nyinung.

⁴⁵ Ih nyüjela linung, tunüo Nü adoba nyinung Ihnü müküpre.

⁴⁶ Yangthsarü te Ihnü Nü yuzeng müdhesohnung, ko Ihnü müshahnung.

⁴⁷ Nü Yuzeng nyicho la Ih akünyang ngure, tunüo Ihnü arüh müire.

⁴⁸ Ihnü Nü yuzeng drüre ko müire: Ihnü Nü athülabala lümdhingchinung.

Yuzeng la Longlangba

⁴⁹ Ih Nü dikehrü te Nü anyengchocho lümchehng; hütsünü I khyang alongdi jüko.

⁵⁰ Chongcha lasü Ih tbachi licho, tunüo Nü anyengchobanü akang jücho.

⁵¹ Amütsarü tsü I müthsamünyürü lile; ta Nü yuzeng tenü Ihnü müza.

⁵² Papade Nü yukhacho lümchehre, ko hütsünü Ih tbachisohre, O Abüdongba!

⁵³ Amütsarünü Nü yuzeng thsangnyang ngude, I zichürore.

⁵⁴ Limih la Ih azachah lide, Ihnü Nü yuzeng nengdang khi tangre.

⁵⁵ Abüdongba, amala Ihnü Nüh lümchehre, ko Nü yuzeng shulüm lümdhingre.

⁵⁶ Nü yuzeng bichichola Ih akünyang ngure.

Yuzeng la Khakhuchüjücho

⁵⁷ Ihnü müruba apümnü Nüh du, O Abüdongba; Nü yuzeng nyinung Ihnü nyengchore.

⁵⁸ I lasih apümnü Ihnü Nüte kihchire, Nü anyengchocho kyo Ite yanglilüm!

⁵⁹ Ihnü I saying lümdhingko, ko Nü athülaba bichinung Ihnü nyengchore.

⁶⁰ Mümünupü Nü yuzeng nyinung dhsüdhsare.

⁶¹ Amütsarünü I khyang zeng khyangpüjüle, ta Ihnü Nü yuzeng münbüchü.

⁶² Nü Amüsa yukhaba nengdang nengse jünung yürüptülungla Ih jesure.

⁶³ Ih Nü dikehrü atümung ko Nü yuzeng bichirü atümung shangrü lile.

⁶⁴ Abüdongba, limih apüm Nü amüthrehba amüinü jeng lile; Nü yuzeng Ite doung.

Yuzeng Amii

⁶⁵ Abüdongba, Nühnü Nü anyengchocho yohpüko, ko Ih Nü dikehrü te Nühnü müiko.

⁶⁶ I khyang lümlong ko amüdhe jüng, tunüo Ihnü Nü yuzeng chah longlangre.

⁶⁷ Ih müdhsakeh-ede, Ihnü thsameh tsicho; ta adelü Ihnü Nüyu nyire.

⁶⁸ Nüh khütoi atsa ko amüi! Ite Nü yuzeng doung.

⁶⁹ Amüthsehrünü Ih nyüm arahkheh yoko, ta I lasih apümnü Nü yuzeng nyire.

⁷⁰ Nyitsarü hiri anyichehba mühle, ta Ihlü Nü yuzeng la akünyang ngure.

⁷¹ Ih khingchiba tsü I nengdang atsa licho, tunüo hütsünü Nü yuzeng nyichosohcho.

⁷² Limih la thsi apüm tenü Nühnü I khyang jüba yuzeng tsü awüba.

Yuje Yuzeng

⁷³ Nühnü Ih thricho ko khümcho yohpücho; Nü yuzeng nyichonungthsa I khyang anyichehba jüng.

⁷⁴ Nüh drürütinü Ih ngude künyangnung, tunüo Nü anyengchobala Ihnü longlangre.

⁷⁵ Nü yukhaba tsü Amüsa ko Nühnü Ih khingchiba tsü Nüh yujeba thsachonüepü Ihnü müdhele, Abüdongba.

⁷⁶ Nü müthrehba amüinü Ih tbachisohng, Ih Nü dikehrü te Nü anyengchocho kyo.

⁷⁷ Ite yanglilüm ko Ih akang linung, tunüo Nü yuzeng la Ih akünyang ngure.

⁷⁸ Arahkheh la Ih mülangjücho nyükheh amüthsehrü tsü ashah khyüsohng; ta Ihlü Nü athülaba yangchinung.

⁷⁹ Nüh drürü ko Nü yuzeng müdherü atümung I yanglang rosohng.

⁸⁰ I khyang Nü yuzeng ajeng nyisohng, ko I khyang ashah tükhyüsoh.

Nüchehnung Akihchiba

⁸¹ Nü akangcheh yingchonü Ih kyahpehko; Nüyula Ihnü longlangre.

⁸² Nü anyengchocho yingchonü I nah tsohchehko. Ihnü tsingdhingcho, “Nühnü khode Ih rükunung?”

⁸³ Ih yongkha shinga koh kyo akhyüchah mühle, ta Nü yuzeng Ihnü münbüchü.

⁸⁴ Khütoi nyahli Ihnü yingnung? I dhsümthserü khode khingchinung?

⁸⁵ Nü yuzeng mühnyirü amüthsehrünü Ih xohsohnung mütrüm juko.

⁸⁶ Nü yuzeng apüm longlangnung kehle; Nyitsarünü arahkheh la Ih dhsümthsere, Ih troung.

⁸⁷ Arühnü azikyah dunü Ih mümüpseh; ta Ihnü Nü yuzeng müpehjü.

⁸⁸ Ihnü Nü yuzeng bichinungthsa, Nü müthrehba amüi khu Ite tsa bichieng.

Yuzeng la Yudsi

⁸⁹ O Abüdongba, Nüyu achangka mülinung; hütsü ninglanglih lasü achangka mülinung.

⁹⁰ Nü longlangba shangnü shang linung; Nühnü alimih külüpcho, ko hütsü lidu lire.

⁹¹ Nü yuzeng khu lüpcho chünye chii lire, tunüo arüh atümung Nü dikehrü lile.

⁹² Nü yuzeng khu Ih akünyang müngurelang, chongcha khu Ih sopehpü libae.

⁹³ Ihnü Nü athülaba khodesü müpehjünung; tunüo hütsüri khu I akang yohpüjüre.

⁹⁴ Ih Nüyo, Ih khümchoung! Ihnü Nü yuzeng nyinung müküpko.

⁹⁵ Amütsarünü Ih müpsehnung jümre, ta Ihnü Nü yuzeng lümdhingre.

⁹⁶ Lüpcho achangka lilepü Ihnü nyichoko, ta Nü yuzeng adekheng.

Yuzeng Amüi

⁹⁷ Ihnü Nü yuzeng khütoh-i müiro! Ihnü mükhyang hütsü nengdang lümdhingre.

⁹⁸ Nü yuzeng Ite lede lire ko I rorüh tenü alaa athsehdhsa kangsohre.

⁹⁹ Adorü tenü Ihnü alaa nyichehre, tunüo Ihnü Nü athülaba lümdhingre.

¹⁰⁰ Azirü tenü I lümlong adiu, tunüo Ihnü Nü yuzeng nyire.

¹⁰¹ Ihnü saying amütsa apüm müricho, tunüo Ihnü Nü yuzeng bichinyüre.

¹⁰² Ihnü Nü athülaba müpehjü, tunüo Nüpu I adorü lile.

¹⁰³ Nü athülaba khütoh-i anyiyah thsakukih tenüsü anyiyahba!

¹⁰⁴ Nü yuzeng lanü lümlong ngure, hütsünü saying amütsa apüm thrünyire.

Yuzeng lanü Atsingse

¹⁰⁵ Nüyu I jing nengdang dsi ko I lang nengdang atsingse.

¹⁰⁶ Nü athülaba nyinung Ihnü Nüte yuchümre.

¹⁰⁷ Abüdongba, I chongcha dirale; Nü anyengchocho kyo I akang yohpüjüng.

¹⁰⁸ Ihnü nengsejüba khyüchoung, O Abüdongba. Ko Nü yuzeng Ite doung.

¹⁰⁹ I kang jünung Ih lede rungnüm lile; Ihnü Nü yuzeng münbüchü.

¹¹⁰ Amütsarünü I khyang zeng khyangpüjüle, ta Ihnü Nü yuzeng mühnyi mühle.

¹¹¹ Nü yuzeng tsü lede I kuthsi; arüh I lasih la akünyang.

¹¹² Ih asü yingcheh; Nü yuzeng bichinung Ihnü dhrongchehko.

Yuzeng la Akhümcho

¹¹³ Lasih anyüh thrirü Ihnü thrünyire, ta Ihnü Nü yuzeng müire.

¹¹⁴ Nüh I khümrü ko I tsungtirü, Nüyula Ihnü longdire.

¹¹⁵ Nührü münyirüti, I tenü tsieng. Ihnü I Tsingrang yuzeng nyinung.

¹¹⁶ Nü anyengchocho roh-i I khyang tase jüng ko I akang linung; I longdichola I suh tüzahsoh!

¹¹⁷ Ih marehng, ko Ih khümcho linung, Nü yuzeng lede bichinung.

¹¹⁸ Nü yuzeng mühnyirü atümung Nühnü mükhyüchore, arüh akhürah lümchung amii mühle.

¹¹⁹ Amütsarü atümung Nühnü sehnyeh kyo khichire; hütsünü Ihnü Nü athülaba müire.

¹²⁰ Nüh drüchonü Ih dhridhrire; ko Nü yukhaba Ihnü drüre.

Yuzeng te Yochonyiba

¹²¹ Tu athsalang ko atsa hütsü Ihnü nguchiko; I rorüh kheh la Ih tüjü!

¹²² Nü dikehrü tronungepü nyengchoung; Hongzirünü Ih tüsehchisoh!

¹²³ Nüh akhümcho ko Nü Amüsa anyengchocho tikehnung yingchonü I nah tsohchehko.

¹²⁴ Nüh müthrehba amüi aichi Ih bichieng, ko Nü yuzeng Ite doung.

¹²⁵ Ih Nü dikehrü, Nü adoba nyichehnungthsa I khyang anyichehba jüng.

¹²⁶ Abüdongba, hi Nühnü nguchinung akyange, tunüo nyitsarünü Nü yuzeng mühnyire.

¹²⁷ Ihnü hon ko müluchehcho hon tenü Nü yuzeng alaa müire.

¹²⁸ Hütsünü Nü athülaba apüm bichire; Ihnü arahkheh lang apüm thrünyire.

Yuzeng Nyinung Amükhyahba

¹²⁹ Nü adoba anyemüyangnunge; Ihnü I lasih apümnü hütsüri nyire.

¹³⁰ Nüyu changnah yobanü atsingse jüre ko amümüdherü khyang lümlong jüre.

¹³¹ Nü yuzeng mükhyahchonü; Ihnü I be kapü yingre.

¹³² Nühnü müirü atümung te nguchicho kyo, I yang ximülaang ko yanglilüm ngung.

¹³³ Nü anyengchocho kyo, Ih tüngahsesoh; amünyinü Ih tükohsoh.

¹³⁴ Ihnü Nü yuzeng nyinungthsa, I nyümrü khehlanü Ih khümchoung.

¹³⁵ Nü dikehrü chah Nü romih hekehjüng, ko Ite Nü yuzeng doung.

¹³⁶ I nahshükih yongkhi roh-i pohre, tunüo nyitsarünü Nü yuzeng mühnyire.

Yuzeng Yuje

¹³⁷ Abüdongba, Nüh Amüsa ko Nü yukhaba yuje.

¹³⁸ Nühnü jüba yuzeng khüdupinü atsa ko yuje lile.

¹³⁹ Michang kyo I rihlongnü trüpre, tunüo I rorütinü Nü yuzeng mükhichire.

¹⁴⁰ Nü anyengchoba tsü müchehdhingko! Ihnü hütsü müire!

¹⁴¹ Ih aikyahrü ko mükhimüngurü, ta Ihnü Nü adoba müpehjü.

¹⁴² Nü Amüsaba achangka mühle, ko Nü yuzeng tsü lede yuje.

¹⁴³ Chongcha ko alümxünü Ih jengko, ta Nü yuzengnü I khyang akünyang jüre.

¹⁴⁴ Nü athülaba lede yuje; I khyang anyichehba jüng ko Ih lichehnung.

Anüchehnung Akihchiba

¹⁴⁵ I lasih apümnü Nüte züdere; laling, Abüdongba, ko Ihnü Nü yuzeng nyinung.

¹⁴⁶ Ihnü Nüte züdere; Ih khümchoung ko Ihnü Nü yuzeng bichinung.

¹⁴⁷ Mütsingsede Ih surore ko Nüyula Ihnü longdire.

¹⁴⁸ Nü athülabala lümdhingnung; Ih müyüpsehchehre.

¹⁴⁹ Nü amüthrehba amüila Iyu nyijüng, O Abüdongba, Nü yanglilümla I kang rikieng.

¹⁵⁰ Nü yuzeng mübichirü, I dhsümthserü amünyethsa role.

¹⁵¹ Ta Abüdongba, Nüh Ih amünyeh lile, Nü yuzeng apüm apümpü lile,

¹⁵² Akhulangnü Ihnü Nü athülaba nyichehko; Nühnü arüh achangka müli lisohnung külüpko.

Arüku Nengdang Kihchicho

¹⁵³ I chongcha dhing ko Ih khümchoung, tunüo Ihnü Nü yuzeng müpehjü.

¹⁵⁴ Ih khüm ko Ih lehchehjüng; Nü anyengchoba kyo Ih khümchoung!

¹⁵⁵ Amütsarüti mükhümchonung, tunüo arühnü Nü yuzeng mübichi.

¹⁵⁶ Ta Abüdongba, Nü yanglilüm amülah; yanglilüm ngung ko Ih khümchoung.

¹⁵⁷ I rorüh ko nyüpmüsehrü khütang lile, ta Ihnü Nü yuzeng müpehjü.

¹⁵⁸ Akiyohchürüti ngude, Ih wahcho, tunüo arühnü Nü yuzeng mübichi.

¹⁵⁹ Dhing Ihnü Nü yuzeng khütoi müiro, Nü amüi khodesü mümülichire, Ih khümchoung.

¹⁶⁰ Nü yuzeng apüm tsü yuje, ko Nü Amüsa yukhaba apüm achangka mühle.

Abüdongba Yuzeng Müsachehba

¹⁶¹ Arahkheh la yangthsarünü Ih becho, ta Ihnü Nü yuzeng drüre.

¹⁶² Kuthsi khütang lirü akünyang kyo, Nü anyengchoba khu Ih khütoh-i künyangro.

¹⁶³ Ihnü arahkheh apüm thrünyire ko zongre, ta Ihnü Nü yuzeng müire.

¹⁶⁴ Ihnü nyümong mükhu Nüh Amüsa yukhaba shulüm dhünyehpili Nü nengsere.

¹⁶⁵ Nü yuzeng müirüti atsikehchah lile, ko arüh khülusohnungthsa tusü mühle.

¹⁶⁶ Ih khümchosohnung Nüh yingre, Abüdongba, ko Nü yocho du Ihnü nguchire.

¹⁶⁷ Ihnü Nü adoba bichire; I lasih apümnü hütsü müire.

¹⁶⁸ Ihnü Nü yuzeng ko athülaba bichire; Ihnü nguchicho lüpcho Nühnü ngule.

Arüku Nengdang Dangkhidangnang

¹⁶⁹ I züdecho Nüh chihsohng, Abüdongba. Nü anyengchocho roh-i, I khyang anyichehba jüng.

¹⁷⁰ Ihnü kihchicho nyieng, ko Nüyu roh-i Ih khümchoung.

¹⁷¹ Ihnü lede Nüh senung, tunüo Nü yuzeng tsü yuje.

¹⁷² Ihnü Nü yuzeng nengdang khi thsanung, tunüo Nü yuzeng tsü yuje.

¹⁷³ Lede Ih rükunung khengyeng lieng, tunüo Ihnü Nü yuzeng bichire.

¹⁷⁴ O Abüdongba, Nü akhümcho shulüm Ih khütoh-i nahkoh dhsaro! Nü yuzeng la I akünyang ngure.

¹⁷⁵ Ihnü Nüh senungthsa, I khyang akang jüng; Nü thülabanü Ih troung.

¹⁷⁶ Achahcho san kyo Ih thrüchire; Nü dikehrü ro yangching, tunüo Ihnü Nü yuzeng müpehjü.