NENGSEKHI 118 - AMÜSA BAIBEL (BSI)

Akoh Nengdang Nengse Jücho

¹ Abüdongba khyang anengse jüng, tunüo Abi atsa, ko Abi amüi achangka mühle.

² Israelrü khyang yosohng, “Abi amüi achangka mühle.”

³ Tsingrangba bebürüti khyang yosohng “Abi amüi achangka mühle”

⁴ Abi mübürüti atümung khyang yosohng, “Abi amüi achangka mühle.”

⁵ I chongchala Abüdongba te dsicho; Abinü Ite lalingcho ko Ih lehchehcho.

⁶ Abüdongba Ite lile, Ihnü müdrünung; Sünü Ite tu nguchinung?

⁷ I rükubong tsü Abüdongba lile. Ihnü I rorüh kohcho ngunung.

⁸ Nyitsarü chah longlangnung tenülü Abüdongba chah longlangcho atsau.

⁹ Nyitsarü adirü chah longlangnung tenülü Abüdongba chah longlangcho atsau.

¹⁰ Arorüh khütangonü Ih mükangticho; ta Abüdongba tasenü Ihnü arüh changjücho.

¹¹ Mükangmüla arühnü Ih mükangticho, ta Abüdongba tasenü Ihnü arüh changjücho.

¹² Thsahnü kyo arühnü Ih tsüticho, ta Abüdongba tasenü Ihnü; zeng chah michang kyo arüh tahpehcho.

¹³ Müring müdrüpü Ih becho ko Ih akohchehrü licho, ta Abüdongba-nü Ih rükucho.

¹⁴ Abüdongba-nü Ih rezehsohcho: Abinü Ih khümchocho.

¹⁵ Tsingrangba nyitsarü shükuh la akoh akünyang yuva tsü nyidhing: “Hütsü Abüdongba Akohba tasenü nguchicho.

¹⁶ Abi tasenü Ihsa khyang akohba hirojüko, khatala Abi akohba tase!”

¹⁷ Ih müsünung; ta Ih akang linung ko Abüdongba-nü nguchicho sobhonung.

¹⁸ Abinü Ih khee khingchicho, ta Abinü Ih müsüsoh.

¹⁹ I khyang Amübükuh trahtri khangthrujüng; Ihnü hütsüla züdu Abüdongba khyang anengse jünung.

²⁰ Hiba hi Abüdongba tbükhüm; hila Amüsarü du züronung.

²¹ Ihnü Nüh sere, Abüdongba, tunüo Nühnü Ite lalingcho, tunüo Nühnü I khyang akoh jücho.

²² Kuthsarünü mükhyüba lung tsü apüm tenü ayingba kangcho.

²³ Hi Abüdongba nguchi; hi Ihsa nahte anyemüyangnung.

²⁴ Hi Abüdongba-nü külüpcho nyümong; Ihsanü anengsejo hütsüla künyangtanung.

²⁵ Ihrü khümchoung, Abüdongba, ihrü khümchoung! O Abüdongba, ihrü khyang akoh jüng.

²⁶ Abüdongba nengla sü roro, Tsingrangba-nü abi müwajüng! Abüdongba kuh lanü ihrünü nüh müwajüre.

²⁷ Abüdongba tsü Tsingrang; Abinü Ihsa khyang avisa jüko. Nührü kheh la singjengza bipü shemüsu thsüti tsü dikehng ko bholu tsü mükang.

²⁸ Nüh I Tsingrang, Ihnü Nüh senung; Nü dicho Ihnü sobhonung.

²⁹ Abüdongba khyang anengse jüng, tunüo Abi atsa, ko Abi amüi achangka mühle.