NENGSEKHI 112 - AMÜSA BAIBEL (BSI)

Nyitsarü Atsa Akünyang

¹ Abüdongba seing! Sünü Abüdongba drüro, Sünü Abi yuzengti bichinungla künyangro abi akünyangnung.

² Nyitsarü atsa tsuzarüti limih la tase amülah linung; abi trah müwajünung.

³ Abi kukhi kuthsi alirü thsanung, ko abi lede zehzang linung.

⁴ Nyitsarü atsa, yanglilüm, amüi ko yuje kehba nengdang, amarürah la atsingsenü visanung.

⁵ Sünü yanglihkeh nyajüro, sünü yuje cho shithsabhülehro, abi akünyangnung.

⁶ Nyitsarü atsa khodesü amükoh müngunung; abi lede lümkehnung.

⁷ Abinü yusi amütsa yuchinung müdrüre; abi yudsi adrengdreng ko abinü Abüdongba chah longlangre.

⁸ Abinü mülümxüre mahkhang müdrüre; abinü abi rorüti kohnung tsü tsüpre.

⁹ Abinü dhsangthsirü khyang jünyüseh jüre, ko abi amüi khodesü müzahre; abi tase ko jengreng linung.

¹⁰ Amütsarünü hi ngure ko zichürore; arühnü thrünyi dhingre ko changpehre; lede nengdang arüh alongdi mühle.