NENGSEKHI 107 - AMÜSA BAIBEL (BSI)

VAKHA MÜNGA Nengsekhi 107— 150 Tsingrangba Tsacho Seba

¹ “Abüdongba khyang anengse jüng, tunüo Abi atsa lile; Abi amüi achangka mühle!”

² Abüdongba sede hiri yu loli bichieng, nührü Abinü khümchorü atümungnü. Nührü rorüh khehlanü Abinü nührü khümchocho.

³ Ko yangpirü lih lanü, nyüchüro nyüzüdu, kihku ko kihjinglangnü nührü nüli rocho.

⁴ Yangdila linung lang müngupü khürü lipilih la thrüchicho.

⁵ Yangseh xoseh arüh alongdi mülipehcho.

⁶ Hütsüde arüh chongchala arühnü Abüdongba te züdecho ko Abinü arüh chongcha lanü khümchocho.

⁷ Arüh linung yangdi khüdu yang Abinü amüchongba lang lanü nücho.

⁸ Abi müthrehba amüi ko arüh shulüm Abi anyemüyangnung nguchi nengdang, arühnü Abüdongba seing.

⁹ Axorü Abinü xodhrümjüre ko yangsehrü atsanü jengjüre.

¹⁰ Khürü amarürah la alongdi müli rangyohrü ixilihnü rah chongcha liko,

¹¹ tunüo arühnü Akohba Tsingrang Yuzeng nyümcho ko Abi athülaba mükhyücho.

¹² Kheseh nguchichonü arüh kyahsehpü; arüh ngahsehcho ko atrorü süsü mülicho.

¹³ Hütsüde arüh chongchala Abüdongba te dsicho ko Abinü arüh khümchocho.

¹⁴ Amarürah ko alongdi müli lanü Abinü arüh nüchehcho ko arüh ixilih zangzang tohnahjücho.

¹⁵ Abi müthrehba amüi ko arüh shulüm Abi anyemüyangnung nguchi nengdang, arühnü Abüdongba seing.

¹⁶ Abinü imüyeng kukhang thsangnyangjüre ko idhse atohtising khyahnahjüre.

¹⁷ Arüh münyi ngang ko amünyi nguchi ngang, khürü müsithsa chongcha licho;

¹⁸ arühnü tsang müdhingnyüpehcho ko sünungthsa licho.

¹⁹ Hütsüde arüh chongchala arühnü Abüdongba te züdecho, ko Abinü arüh khümchocho.

²⁰ Abi yuzengnü arüh kyangjücho ko kong lanü arüh khümchocho.

²¹ Abi müthrehba amüi ko arüh shulüm Abi anyemüyangnung nguchi nengdang, arühnü Abüdongba seing.

²² Arühnü kangmübü khu ko Abinü nguchicho apüm shulüm akünyang khi khu Abi sesohng.

²³ Khürü Kihjü michah kihkuh la rachire, Kihdi michahnü shehshere.

²⁴ Abüdongba-nü kihdi michah tu nguchiro, hütsü arühnü ngucho.

²⁵ Abinü yuzengjücho ko nyübong arangcheh fünung dikehcho ko kiloh chürosohcho.

²⁶ Kihkuh tsü dhimüsucho ko asohlang mülingyohtsicho. Dhsürü hiroh-ila nyitsarüti re müzehpehcho;

²⁷ amücharü kyo arüh yüyümingming ngasehcho, arüh amüdhe apüm akhyüchah müli kangcho.

²⁸ Hütsüde arüh chongchala arühnü Abüdongba te züdecho, ko Abinü arüh khümchocho.

²⁹ Abinü tsingxinyübong longlümsohcho ko kiloh zahsohcho.

³⁰ Longlüm kangcho nengdang arüh künyangcho, ko arühnü khyünyüba kihkuh yaji la Abinü arüh khümcho norocho.

³¹ Abi müthrehba amüi ko arüh shulüm Abi anyemüyangnung nguchi nengdang arühnü Abüdongba seing.

³² Müyurü shimükhongchola arühnü Abi dicho sobhoung ko langnürüti shibülungchola Abi seing.

³³ Abüdongba-nü khüdupinü yongkhiti kungpehsohcho, ko kihna müpohsohcho.

³⁴ Abinü asu lih akhyüchah müli kangsohcho tunüo hütsüla lirü mütsachonü.

³⁵ Abinü lipilih changtphü ko akung lihnü kihnatung kangsohcho.

³⁶ Hütsüla Abinü yangseh lirü lisohcho, ko arühnü alinung yangdi khüdu külüpcho.

³⁷ Luh tsü arühnü chiicho ko shükusih khyümcho ko khütang xacho.

³⁸ Abinü arüh müwajücho, ko arüh tsuzarü adrong licho; ko Abinü arüh misüti müchangsohcho.

³⁹ Khode arüh kohchehcho ko nyüpmüseh chongchasoh bichicho.

⁴⁰ Abinü anyüpmüsehrü mülangjücho, ko lipilih la lang thrüma rümchisohcho.

⁴¹ Ta Abinü ailümrü chongchalanü khümchocho ko santi kyo arüh kukhiti zikehsohcho.

⁴² Amüsarünü hi ngu künyangre, ta amütsarü atümung sahmüthsasohre.

⁴³ Asithsarünü hiri nengdang lümdhingsohng; arühnü Abüdongba müthrehba amüi müdhesohng.