NENGSEKHI 105 - AMÜSA BAIBEL (BSI)

Tsingrangba ko Abi Müyurü

¹ Abüdongba khyang anengse jüng, Abi dicho sobhoung; Limih te Abinü nguchicho züdeing.

² Abüdongba te anengse khi thsaang; Abinü anyemüyangnung nguchicho young.

³ Ihsa Abi yo thsacho künyang; Abi mübürü atümung künyangsohng.

⁴ Arüku nengdang Abüdongba yang wüng; ko mütozah Abi mübüng.

^5-6 Nührü Abraham, Abi dikehrü trah; nührü Jakob, Abinü throchehcho trah: Tsingrangba-nü nguchicho thsayahiya ko Abinü jüba yukhaba lümchehng.

⁷ Abüdongba tsü Ihsa Tsingrang; Abi yuzeng tsü limih apüm nengdang.

⁸ Abi azengchocho shang hajar adrong nengdang linung.

⁹ Abraham te zengtacho ko Isak te nyengchocho Abinü yohpünung.

¹⁰ Abüdongba-nü Jakob te azengchotaba külüpcho, hütsü lede nengdang linung.

¹¹ Abinü yocho, “Ihnü nü khyang Kanan limih tsü jünung.” “Hütsü nüpu yo kangnung.”

¹² Tsingrangba nyitsarü tsü adükeh du, Kanan limih la shirü thsa licho.

¹³ Arüh limih khüdu lanü khüdu, yanglih khüdu lanü khüdula thrüchicho.

¹⁴ Ta sü khyangsü arüh münyüpmüsehsohcho; arüh tsungtinung yangthsarü müzahsohcho:

¹⁵ “Athrochehcho I dikehrüti tüdhsakehjü, azikehrüti chah kheh tüthah.”

¹⁶ Abüdongba-nü arüh lih yang yangkong müthehcho ko arüh tsuyongnung apüm hitsijücho.

¹⁷ Ta Abinü nyüh khüdu Josef, ayurü kyo arüh bekhu müthehcho.

¹⁸ Abinü choyohcho yuje mütikeh yingcheh, abi jing ixilihnü rahcho,

¹⁹ ko ahong la idhse müshi yohjücho. Abüdongba yunü abi athsalang yuzi jücho.

²⁰ Achotsü Ijip yangthsabanü abi lehchehcho; Limih yangthsarütinü abi müthehcho.

²¹ Abinü abi thsaxüküm dhingyehsohcho, ko yangthsaba dikehrüti michah tase ko abi dhrüzeti thülanung

²² tase jüpü, abi yanglih apüm michah yangthsarü kangsohcho.

²³ Hütsüpü Jakob-nü Ijip lang wücho ko hütsüla licho.

²⁴ Abüdongba-nü arüh khyang azarü khütang jücho, ko arüh rorüh tenü rezehba kangsohcho.

²⁵ Abinü Ijiprü khyang abi nyitsarü thrünyisohcho ko arüh thsüyohchü bichisohcho.

²⁶ Hütsüpü Abinü throchehcho Abi dikehrü Mosa ko Aron müthehcho.

²⁷ Arühnü Ijip la Tsingrangba akohba nguchi ko thsayahiya nguchicho.

²⁸ Tsingrangba-nü hütsü lih la ama müthehcho, ta Ijiprünü Abi yuzeng mühnyicho.

²⁹ Abinü arüh yongkhiti ashüh kangsohcho, ko ngu apüm süsohcho.

³⁰ Khengnü arüh lih bhümtisohcho, yangthsaba kuh mii jengsohcho.

³¹ Tsingrangba-nü yuzengjo, limih jeng sümüza ko bhifü pohsohcho.

³² Abinü arüh lih la tsing mülih shurü ko tsingchi müthehcho;

³³ Arüh shükusishü ko ngurüsing ko singdongti apüm thsangnyangjücho.

³⁴ Abinü yuzengjücho ko khengqu mükhilong chürosohcho;

³⁵ arühnü alih la singdongti ko tsahma apüm tsujücho.

³⁶ Abinü Ijiprü kukhi atümungla aukhuba müpsehcho.

³⁷ Hütsüpü Abinü Israelrü nüchehcho; arühnü hon ko taripi hicho, ko arüh atümung nyükheh atsa ko rezeh licho.

³⁸ Ijiprünü arüh drücho ko arüh tside künyangcho.

³⁹ Tsingrangba-nü arüh michah nyükhi ko aromang michangnü avisa jücho.

⁴⁰ Arühnü chingcho ko Abinü mümüyüh müthehcho; ko ninglangnü arüh khyang tsuyongnung jücho.

⁴¹ Abinü lung khüdu müprüp kih pohchehsoh yongkhi kyo lipilih la pohsohcho.

⁴² Abi dikehrü Abraham te Amüsa anyengchocho Abinü lümkehcho.

⁴³ Hütsüta Abinü athrochehcho nyitsarü nüchehcho, ko arühnü akünyangnü züde khi thsacho.

⁴⁴ Anyitsarütinü yuzeng nyisohnung ko Abi yuzeng bichisohnung,

⁴⁵ Abinü aparü lih arüh khyang jücho, ko arüh luh arüh khyang khyüsohcho. Abüdongba seing!