NENGSEKHI 104 - AMÜSA BAIBEL (BSI)

Athribong Nengseba

¹ Abüdongba seing, I nbü! O Abüdongba, I Tsingrang, Nüh khütoh-i arangcheh-o! Nüh adi ko ahechinü jeng lile;

² atsingsenü nüpu müshüti lile. Ninglanglih tsü Nühnü shükuh roh-i khyangpüle,

³ ko amilang kih michah Nü kuh thsa lile. Nyükhi tsü Nühnü Nü akhüluba kyo bichire ko nyübongchah Nühnü shangre.

⁴ Nyübong tsü Nühnü Nü yusi hirü kyo, ko ningmüla tsü Nü riwürü roh-i bichire.

⁵ Limih tsü Nühnü amüdongkehji chah drengdreng yohpüle, ko hütsü khodesü mümühachinung.

⁶ Hütsü michah kihjü tsü Nühnü müyah roh-i yohpüle, ko azongti tsü kihnü tingti lile.

⁷ Khode Nühnü kih tsü yübünang, arühnü tsire; Nü yuzeng khongcho yuchide arühnü tsire.

⁸ Nühnü arüh khyang throcheh yohpüjüba azong michah tuwücho, ko angah yang jowücho.

⁹ Thali limih tingtinung lanü khümchonung nengdang, arühnü khodesü mükhuchehnungthsa Nühnü lurü yohpüko.

¹⁰ Angah la Nühnü kih züchehsohre; ko azongti kahla yongkhi pohsohre.

¹¹ Arühnü rangmü kanglungrü shulüm kih chixire; hütsüla rangmü gaduti xodhrümre.

¹² Shündhün liba singdongti chah, uzatinü arüh süp shüre ko khi thsare.

¹³ Ninglangnü Nühnü azongti khyang tsing rosohre ko Nü amüwanungnü limih tsü jengre.

¹⁴ Nühnü misü khyang za ko Nyitsarü khyang singdong zisohre, hütsünü abi tsahma zisohnung

¹⁵ ko abi künyangsohnung yongkha, abi longtbasohnung olive tuji, ko tase nengdang hümdhse chürosohre.

¹⁶ Lebanon la Cedar sing nengdang tsing thangchi ngure, Abüdongba apunü khyümcho, apu singdong.

¹⁷ Hütsüchah uzatinü arüh süp shüre; Kih uzanü müyah du singchah asüp shüre.

¹⁸ Shuhunü azong athseng chah lire ko dhingtsünü lungrah la ku münyire.

¹⁹ Tsingkang müyü müdhenung Nühnü chonu külüpcho; Nyünü züdunung akyang müdhere.

²⁰ Nühnü aromang külüpcho ko amala rangmü kanglungrü apüm chürore.

²¹ Tsingrangba-nü chixiba tsuyongnung yangchide, kihkhünying zanü rengre.

²² Khode nyü chüronang, arühnü thali wü arüh kuh la yüpjore.

²³ Hütsüde nyitsarünü wünü ama yingcheh nguchire.

²⁴ Abüdongba, Nühnü hütsütoi külüpko! Nühnü pisara arüh külüpko! Limih tsü Nühnü thrichotinü jeng lile.

²⁵ Wünü kihjü khüdu arangcheh ko amüza, hütsüla mükhicheh kanglungrü, amülah ko amüza lire.

²⁶ Hütsüla kihkuh tbhengre, ko Nühnü thriba kihkangdi Kijang mungre.

²⁷ Arüh atümungnü akyang tsuyongnung ngunung Nüh yingre.

²⁸ Nühnü arüh khyang jüre ko arühnü tsure; Nühnü tsuyongnung jüre ko arüh longnyüpre.

²⁹ Nüh ximüla tside, arüh drüre; Nühnü arüh sah hitside, arüh süre ko thali alih kangre.

³⁰ Ta Nühnü asah jüde, arüh chichehre; Nühnü alih khyang akang asi jüre.

³¹ Abüdongba ahechi müchangka lieng! Apunü külüpchola Abüdongba künyangsohng!

³² Abinü alimih chah dhingre, ko hütsü dhridhrire; Abinü azongchah thahpüre, ko hütsülanü mikhu chürore.

³³ Ihnü Abüdongba te I kang ayung khi thsanung; Ih akang litashi I Tsingrang te nengsekhi thsanung.

³⁴ I khinü Abi künyangsohng, tunüo I akünyang Abi chahnü rore.

³⁵ Münyirüti limih chahnü changsohng; ko amütsarüti adelü tülisoh. Abüdongba seing. I nbü! Abüdongba seing!