NENGSEKHI 103 - AMÜSA BAIBEL (BSI)

Tsingrangba Amüi

¹ Abüdongba seing, I nbü! I pümshünü, Abi Amüsa neng seing!

² Abüdongba seing, I nbü, ko Abi amüi tsü khütoh-inang tünbüchü.

³ Abinü I münyi apüm mülang pehjüre ko I dhsara apüm kyangjüre.

⁴ Abinü Ih kong lanü khümchore ko amüi ko achomangnü Ih müwajüre.

⁵ Ih dhreza ko müdi kyo rezeh lisohnung, Abinü I kang atsanü jengjüre.

⁶ Abüdongba-nü nyüpmüsehrü khüm yukhare ko arüh alanglang jüre.

⁷ Abinü Mosa te Abi lümchung mishacho ko Israelrü khyang Abi akohba nguchi tsü ngusohcho.

⁸ Abüdongba tsü yanglilüm ko amüi, zichüronung khai ko müthrehba amüinü jeng lile.

⁹ Abinü yübü du mülire; Abi zichüro du mülire.

¹⁰ Abinü Ihsa ngunung aleng mükhingchire mahkhang Ihsa münyi ko thsamehcho mülih müjüre.

¹¹ Alimih tenü ning tsü khüta athseng liro, hütsütoh-i Abi dhichirüti yanglang Abi amüi lile.

¹² Nyüchürolang tsü nyüzüdulang tenü khüta ashu liro, hütsütoi Ihsa tenü Ihsa münyi Abinü pehjüko.

¹³ Au khüdunü atsurü müicho roh-i, Abüdongba amüi tsü Abi dhichirü te hütsütoh-i lile.

¹⁴ Tunü Ihsa thrichonang Abinü müdhele; Ihsa asongsongepü Abinü lümkehle.

¹⁵ Ihsa nengdanglü, Ihsa akang tsü za kyole. Rangmü yungpi kyo Ihsa zire ko pire;

¹⁶ Hütsüpü nyübongnü füchire ko fotsire, ko hütsü sünüsü thali müngure.

¹⁷ Ta sürünü Abüdongba dhichiro, Abi amüi müchangkare ko

¹⁸ Abi azengchocho te yuje lirü ko Abi yuzeng nyirü te, Abi atsaba tsü shang apüm la lire.

¹⁹ Abüdongba-nü Abi pümji ninglang yohpüko; Abi atümung michah yangthsaba.

²⁰ Abi yuzeng nyirü ko Abi yocho nyirü, nührü rezeh ko akohba ninglang riwürütinü, Abüdongba seing.

²¹ Ninglang ziiti, Abi dikehrüti, sürünü Abi lümcho nguchiro; nührünü Abüdongba seing!

²² Abinü yangthsachola lirü atümungnü Abüdongba seing, Abüdongba seing, O I nbü!