NENGSEKHI 102 - AMÜSA BAIBEL (BSI)

Chongcharü Dhrezarü Khüdu Dangkhidangnang

¹ I dangkhidangnang nyijüng, O Abüdongba, ko I kihchicho nyieng!

² Ih chongchala lide, I tenü tüximüla! Ite nyieng, ko Ihnü dside zah laling!

³ I kang mikhu kyo chang tsire; Ifü michang kyo tahpehre.

⁴ Ih za kungcho kyo kungpehko; Ih tsang mütsunyüpehko.

⁵ Ih zi rühchire; Ih arüh du kang threhchehko.

⁶ Ih lihpi la hogon kyo lile, apehcho lih la bhohphu kyo lile.

⁷ Ih müyüpsehre; kumungchah longyüseh liba uza kyo Ih lile.

⁸ Mükhyang I rorütinü müthsamünyüre; Ih münyüjürütinü I neng dangchi chokehcholare.

^9-10 Nü zii ko rihlong chürochonü, midru I tsang thsare; ko I nahshükih I shingla shoyohre. Tunüo Nühnü Ih hiro dhiyohchüpehcho.

¹¹ Anyüzehlang nbükhüm kyo I kang lile; Ih zanu akungcho kyo lile.

¹² Ta O Abüdongba, Nüh lede yangthsaba. Shang apümnü Nüh lümkehnung.

¹³ Nüh shemüsunung ko Zion chomangnung; abükyü chomangnung akyange; ade becho lile.

¹⁴ Nü dikehrütinü abükyü müire, abükyü changpü linye; abükyü thsangnyangpü linye, arühnü abükyü chomangcho.

¹⁵ Yanglihtinü Abüdongba drünung; limih yangthsarü atümungnü Abi tase drünung.

¹⁶ Khode Abüdongba-nü Zion külüpchinang; Abi mülahcho mishanung.

¹⁷ Athrüchahchüpehchoti te Abinü nyinung, ko arühnü kihchicho yuchinung.

¹⁸ Mükhohla zehrütinü Abi senungthsa Abüdongba-nü tu nguchicho hütsü aronung shang nengdang thrahyohpüng.

¹⁹ Abüdongba-nü Abi Amüsa amichahba lanü dhingchahchücho, Abinü ninglangnü alih la dhingchahchücho.

²⁰ Arangyohrü rühchicho Abinü yuchicho, ko sünung mülangjürüti lehcheh müthehcho.

²¹ Hütsünü Abi neng Zion la sobhonung, ko khode yuchoti ko yanglihti müjang shibülung Abüdongba mübünang,

²² Jerusalem la Abi senung.

²³ Abüdongba-nü Ih azadenü sumüzeh külüpcho; Abinü I kang akhikyah kangsohcho.

²⁴ O Tsingrang, Ih müshide Ih tükhyümüi. O Abüdongba, Nüh lede lire,

²⁵ papade Nühnü limih thricho, ko nüpu khehnü Nühnü ning thricho.

²⁶ Arüh changnung, ta Nüh linung; Shü kyo arüh apüm threhnung. Nühnü shü kyo arüh pehnung, ko arüh changnung;

²⁷ Ta lede Nüh asusuh, ko Nü kang müchangkanung.

²⁸ Ihrü tsurüti khümcho linung, ko Nü atsungtiba pohki arüh chahnü trahchochoti khümcho linung.