NENGSEKHI 10 - AMÜSA BAIBEL (BSI)

Yuje nengdang Kihchicho

¹ Tuepü Nüh ashula liro, O Abüdongba? Ihrü chongchade tuepü Nüpu jangjang rangkhuro?

² Akhürahrünü müthseh ailümrü dhsümthsere; arühbürü zeng la arüh xohsohng.

³ Akhürahrünü abi amütsa nguchila müthsehre; müxümüngurünü chokehcholare ko Abüdongba mükhyüchore.

⁴ Akhürahrünü Abüdongba mülümxüre; Tsingrangba tsü tu mah pü abinü müthsehmüla lümre.

⁵ Akhürahrü lüpchola akoh ngure; Abinü Tsingrangba yukhaba mühnyicheh; Abinü arorüh chah naking hingkehjüre.

⁶ Abinü alüm la yore, “Ih khodesü müshüchinung; Ihlü khodesü müdhsangthsinung.”

⁷ Abi yu tsü chokehchola, arahkheh ko drüsohba dunü jeng lile; athrünyinung ko amütsa yu chonungla abi adsaya.

⁸ Abinü yangti la rang pümre, tuyah mümüdherü müpsehnung. Abi chah dhsükehsohnung abinü thsehre;

⁹ kihkhünying kyo abinü arangjila jüm pümre. Ailümrü rangnung abinü jümre; abi zeng la arüh rangre ko abinü arüh tphahtsire.

¹⁰ Atrorü müliba lerohpehrü khülu jore; re zehrünü arüh kohre.

¹¹ Akhürahrünü apu lüm la yorü, “Tsingrangba-nü mütrore! Aromih rangpehko ko abinü khodesü müngunung!”

¹² O Abüdongba, akhürahrüti khingchieng! Dhsa lirüti lümchehng!

¹³ Akhürahrünü Tsingrangba müthsamünyü alüm la “Abinü Ih mükhingchinungpü khüta yonung?”

¹⁴ Ta Nühnü ngure; chongcha ko khingchi lirü Nühnü dhingyoh yohpüre ko lede arüh tronung rungnüm lire. Atrorü mülirünü Nü khyang khakhuchüjüre; Nühnü lede thsamütsarü trore.

¹⁵ Akhürah ko amütsarü zii tsü thsangnyangjünung; arühnü thali amütsa münguchinungthsa arüh thsamehcho ngang khingching.

¹⁶ Abüdongba tsü achangka müli yangthsabong. Sünü apa tsingrang mübünang abi lih lanü changsohnung.

¹⁷ O Abüdongba, Nühnü suromüchürü kihchicho nyijünung; Nühnü arüh müci mülahsohnung.

¹⁸ Nyüpmüsehrü ko mürürütinü züde yuchinung; Nühnü arüh phikhüm yukhanung, hütsüde asüba nyitsarünü adrünung münguchinung.