NENGSEKHI 1 - AMÜSA BAIBEL (BSI)

VAKHA KHÜDU N. Khi 1— 41 Yuje Akünyang

¹ Sünü amütsarünü thülacho mükhyüchoro, Sünü münyirü khanglang müwüro, mahkhang Tsingrangba mümüdherü yola mümükhongro, arüh akünyangnung.

² Hütsü mülih, Abüdongba yuzeng bichichola arüh akünyang ngure, ko arühnü hütsü ama atsingse yangchire.

³ Arüh yongna bekhümla yaba, bechola asih sihba, ko ava mütrülohba singdong kyole. Arüh nguchicho apüm la akoh ngure.

⁴ Ta nyitsarü amütsa hütsüta mah; Arüh tsü nyübongnü fotsiba mayü kyole.

⁵ Münyirüti Tsingrangba-nü mülangjünung, ko Tsingrangba apu nyitsarü yolanü pathsa yohpünung.

⁶ Amüsarü Abüdongba-nü nüre ko khümchore, ta amütsarü achangnung langla lile.