NEHEMIA 8 - AMÜSA BAIBEL (BSI)

Ezra-nü Müyurü te Yuzeng Khiyocho

¹ Choo dhünyeh-u lalü Israelrü atümung arüh yangditila likhangpehcho. Hütsüba choo akhudiba nyümong arüh atümung Jerusalem la kih tbükhüm te shimükhongcho. Arühnü Bebüba ko Yuzeng la xangchehba Ezra te Abüdongba-nü Israelrü khyang Mosa khu jüba yuzeng vakha tsü yangchinung kihchicho.

² Achotsü Ezra-nü müyurü khingkurü adhrerü ko azarüsü yu nyichehnungrü atümung shibülung lichah hirocho.

³ Hütsüla tbükhüm ngah la tsü abinü Yuzeng tsü anyangnyünü nyüthung chii khicho ko müyurü atümungnü nangkhijo nyicho.

⁴ Ezra tsü hütsü nyümong nengdang singnü tangcho yuthungchah yacho. Abi tsalangthring nyitsarü hiri yacho: Matithia, Shema, Anaia, Uria, Hilkia ko Maseia; ko abi fülilangthring hiri yacho: Pedaia, Mishael, Malkija, Hashum, Hashbadana, Zekaria ko Meshulam.

⁵ Hütsüta Ezra tsü dhimüsu külüpcho yuthungchah tsü yade, müyurü atümungnü abi chah dhinglah dhingcho. Abinü vakha tsü khangthrude, arüh atümungnü shemüsu yacho.

⁶ Ezra-nü yocho, “Adibong Tsingrang, Abüdongba Seing!” Müyurü atümungnü arüh kheh dhimüsu lalingcho, “Amen! Amen!” Hütsüpü arühnü alih la arüh romih hapkeh Abüdongba mübücho.

⁷ Hütsüpü arühnü shemüsu palu yaji la yacho ko Levirü hirinü arüh te Yuzeng tsü changnah yocho: Jeshua, Bani, Sherebia, Jamin, Akub, Shabethai, Hodia, Maseia, Kelita, Azaria, Jozabad, Hanan, ko Pelaiah.

⁸ Arühnü müyurünü nyichehnung nengdang Tsingrangba Yuzeng tsü thsamüla changnah yocho.

⁹ Khode müyurünü yuzeng tsü yuchicho, arüh chah dee thahpüchonü tramüsucho. Achotsü governor Nehemia, bebüba ko Yuzeng la axangcheh Ezra ko Levirünü müyurü te yocho, “Abüdongba nührü Tsingrang jingte chünye nyümong hi Amüsa lile, hütsüeko nührünü tülongri mahkhang tütra.

¹⁰ Ade kulang wüng ko thsüti khyüng. Ailümrü te nührü tsuyongba ko yongkha changtaang. Chünye nyümong hi Ihsa Abüdongba jingte Amüsa lile, hütsüeko tülongri. Abüdongba-nü jüba akünyang tsünü nührü rezehsohnung.”

¹¹ Levirüti wünü müyurü e hitari Amüsa nyümong mülongrirepü yocho.

¹² Achotsü müyurü atümungnü kulang wünü künyangseh tsuyongcho ko aparü tesü changtacho, tunüo arüh te khiyoba tsü arühnü nyichehcho.

Mütpahvi Thsüti

¹³ Nyümong khüu tsutpu müipi lanü athahti bebürü ko Levirü yola Ezra yanglang Yuzeng nyichonung wücho.

¹⁴ Arühnü Abüdongba-nü Mosa khu jüba yuzeng la tsü Israelrünü Mütpahvi thsüti ayung mütpahvi la du libaepü rangchehcho.

¹⁵ Hütsünü Jerusalem ko yangdi apümlang arühnü athülaba hita thrahpü müthehcho, “Yuzeng la thrah licho roh-i mütpahvi thsanung shulüm azonglang wüng ko kee sing, olive, myrtle, Se ko apa singdongti chahnü ajengzati hirung.”

¹⁶ Hütsüta müyurütinü wünü hirocho ko arüh kuh michah, kuh bete, Amübü kuh bete ko Kih Tbükhüm mükang ko Efraim Tbükhüm amünyethsa tungtela mütpahvi thsacho.

¹⁷ Yangtsilangnü rorüh atümungnü mütpahvi thsacho ko hütsürila licho. Hiba hi Nun tsurü Joshua nyümongla nguchichochah khu chünye hi akhudiba thsachonü atümung künyangseh licho.

¹⁸ Thsüti adikehnü achangka nyümong chii arühnü nyümong mükhu Yuzeng lanü khyücheh khicho. Yuzengnü mülacho roh-i arühnü thsüti tsü nyümong dhünyeh müzehcho ko akeh-u nyümong changkacho.