NEHEMIA 5 - AMÜSA BAIBEL (BSI)

Ailümrü Sehchicho

¹ Khülipü khingkurü adhrerü nyitsarü adrongnü arühbürü Jihudarü nyüm yacho.

² Khürünü yocho, “Ihrü kukhi amülah, Ihrü akang linung fürü adhsütah-e.”

³ Khürünü yocho, “Ihrü luh, shükusiluh, kuh ko kohro zeh ajüyeh jüko, hütsünü yangkong shikhe fürü lihnung.”

⁴ Adesü khürünü yocho, “Ihrü luh ko Shükusih luh alihmüthsü yangthsaba khyang jünung nengdang thsi nyako.

⁵ Ihrü ajünirü Jihudarü te ahung khüdu due. Ihrü tsuzarüsü arüh tsuzarü mükyorü do? Ta ihrü tsuzarülü khingnü ayurü kangsohre. Ihrü tsularüti khürülü ayurüthsa ipehko. Ihrü alongdi mühle tunüo ihrü luh ko shükusiluh khyopehjüko.”

⁶ Ihnü arüh longmüsü yuchide zichüro nguchinung dhrongchehcho.

⁷ Ihnü müyurüti michah adirüti ko langnürüti mülangjü yocho, “Nührünü nührübürü jünirü sehchire!” Hiba khiyu chotanung Ihnü müyurü ashimükhong dsichonü yocho,

⁸ “Ihsanü akohcho ajünirü Jihudarü yangpirü khehlanü lihchoko. Ade nührünü nührübürü jünirü nührü te inung khingre!” Langnürütinü tu ayonung müli sahmüthsapehcho.

⁹ Hütsüde Ihnü yocho, “Nührünü nguchiba tsü amüthsalang! Nührünü Tsingrangba drü tu athsalang hütsü nguching. Khang nührünü Ihsa rorüh yangpirü khyang Ihsa müthsamünyüsohnung tükülüp.

¹⁰ Ihnüsü, I shangrüti ko kulirüti nüsü müyurüti khyang thsi ko fürü nyajüsohko. Ade Ihsa khyang jünung licho apüm pehjünung.

¹¹ Arühnü nührü te teecho thsi mahkhang fürü mahkhang yongkha mahkhang olive tuji thsite apüm pehjüng. Ko arüh luh, shükusiluh, olive yo ko kuh arüh khyang thali jüng!”

¹² Langnürütinü lalingcho, “Nühnü yocho kyo ihrünü nguchinung. Ihrünü arüh kuthsi thali jünung ko thsite müchingnung.” Ihnü bebürüti dsinü arüh betenü langnürüti khyang arühnü nyengchoba tsü yuchümsohcho.

¹³ Ihnü I shü racho lehcheh trichi yocho, “Sünü anyengchocho müyohpünang Tsingrangba-nü hita trichi pehjüng. Abinü nührü kuh ko alicho lüpcho hitsijünung ko adeng pehjünung.” Hütsüla zehrü atümungnü yocho, “Amen” ko Abüdongba secho. Ko langnürütinü anyengchocho yohpücho.

Nehemia-nü Abürü Shulüm Mülümcho

¹⁴ Juda lih la Ih governor kang dhüreanyüh thsa ayung, Artaxerxes-nü kang mükyüu lanü sangrepü anyüh chii yangthsade, Ihnünye mahkhang I tsutpurününye governor tsuyongba mütsuyong.

¹⁵ I müngu governor-tinü arüh tsuyongnung ko yongkha nengdang nyümongla müyurü chahnü taripi shekel yüre khyücho. Arüh kulirünü mii müyurüti sehchicho. Ta Ihnü hütsüta müthsa tunüo Ihnü Tsingrangba drücho.

¹⁶ Ihnü I tase apüm tbü külüpchinungla pehcho ko tu kuthsi mükhyübülungcho. I kulirü mii atümung I yola zeh nguchicho.

¹⁷ Nyümong mükhu Ihnü I tsingthsang chah mükangmüshü yucho lanü Ite shirünung rorüh chah lahkeh Jihudarü langnürü ko adirüti nyüh thsihpü dhünyang tüpticho.

¹⁸ Nyümong müthe misüpung khüdu, san yola atsau dhüroh ko hüna adrong khyücho ko nyümong dhüre lili yongkha thangchi tihcho. Ta müyurüti bhamüling müdhe Ihnü governor khüdunü ngunungba tu müchingcho.

¹⁹ O Tsingrang, Ihnü müyurü shulüm nguchicho atsati nengdang Ih lümchehng.