NEHEMIA 2 - AMÜSA BAIBEL (BSI)

Nehemia Jerusalem lang Wücho

¹ Choo müyü khanglang nyümong khüdu, yangthsaba Artaxerxes yangtsu yade, abi yang Ihnü yongkha hiwücho. Abinü khodesü I romih mükhüm müngudhing,

² hütsünü abinü tsingdhingcho, “Tuepü nüh hitoi romih mükhümro? Nüh füdhsarülü mah, nüh tunünang mükünyang.”

³ Ihnü khütang dronü lalingcho, “Nü Ahechi müchangkapü lieng! I jümürü dhrürangcho yangdi thsangnyang yohpüpü ko tbükhümti michangnü tahpeh lipü Ih khüta künyang linung?”

⁴ Yangthsabanü tsingdhingcho, “Nühnü tu khyünyüro?” Ihnü Ning Tsingrang te dangkhidangnangpü

⁵ yangthsaba te yocho, “Nüh Adibongnü Ite künyangkhang ko I kihchicho desahnyükhang, I jümürü dhrürangba yangdi tsü thsachinung shulüm Ih Juda lang wüsohng.”

⁶ Yangthsabanü, yangthsalatpü müshüm pümpü Ihnü kihchicho mülacho. Abinü Ih khütoi nyahli müronung ko khode thalinung pü tsingdhingcho, ko Ihnü bekhyah tsü yocho.

⁷ Hütsüpü Ihnü abi te Eufrates nyüzüdu lahpi liba, governorti te Ih Juda la rachisohng pü yo vathrah khüdu jünung kihchicho.

⁸ Adesü yangthsaba mürong nyahba Asaf te amübükuh nyahji roshengvi, yangdi tbü ko I linung kuh thsanung dhsütah nengdang chingcho. Yangthsabanü Ihnü tsingdhingcho apüm mülacho, tunüo Tsingrangba Ite zehcho.

⁹ Yangthsabanü rothsarü adirüti ko kuri rothsarü mülungo I yola müthehcho ko Ihnü Eufrates nyüzüdu lahpilang tsü shemüsucho. Hütsüla Ihnü governorti khyang yangthsaba chahnü vathrah tsü jücho.

¹⁰ Ta Horon yangdi lanü Sanbalat ko Amon yanglih lanü dikehrü Tobia nyühnü Israelrü tronung khürü rokopü yuchi arüh dee mükünyangcho.

¹¹ Ihnü Jerusalem lang wücho,

¹² ko Jerusalem nengdang nguchinung Ite Tsingrangba-nü yocho hütsü nengdang nyümong asang yingcheh sütesü müyocho. Hütsüpü Ihnü yürüptülungla jesu I yola shangrü khürü nüpü shemüsucho. Ihrünü Ih pümba gadu khüdu du tsü nücho.

¹³ Ihnü nyüzüdulang Angah tbükhüm khu yangdi tsü pehjü kihjing lahpi shirung kihkong langnü sehnyeh tbükhüm khu tside mütsingse-echo. Ih lahkhu tside, thsangnyang liba yangdi tbü ko michangnü tahpehpü liba tbükhümti tsü Ihnü xodhingcho.

¹⁴ Hütsüpü yangdi nyüchürolang Ihnü kihna tbükhüm ko yangthsaba changtphülang tsü wücho. Ta Ih pümba gadu khunungthsa lang mülicho.

¹⁵ Achotsü Ihnü Kidron ngahlangnü jowü tbü tsü dhingcho. Hütsüpü Ih roba lang tsünü thali ro Angah Tbükhüm khu yangdi lang rocho.

¹⁶ Hütsüla lirü sünüsü Ih khüde wücho mahkhang Ih tu nguchichonang mümüdhecho. Ade yingcheh I yola lirü Jihudarü, bebürü, langnürüti, adirüti mahkhang hiba nguchila trotanungrü südesü Ihnü tu müyocho.

¹⁷ Ta ade Ihnü arüh te yocho, “Dhing, Jerusalem ko tbükhümti thsangnyang licho khu Ihsa khüta adhsangthsi nguro! Ihsanü yangdi tbü tsü külüpchinung ko Ihsa ashah hi changpehsohnung.”

¹⁸ Ko khüta Tsingrangba Ite licho ko trocho ko yangthsabanü Ite tu yocho hütsüri arüh te Ihnü yocho. Arühnü lalingcho, “Ihsanü thsachinung dikehnung.” Hütsüta arühnü nguchi tsü dikehnung dhrongcho.

¹⁹ Khode Sanbalat, Tobia ko Arab-rü khüdu Geshem, arühnü ihrü lümchung tsü yuchicho, arühnü ihrü münyodhing yocho, “Nührü tu nguchirepü lümro? Nührünü yangthsaba nyümnung dikehrü do?”

²⁰ Ihnü lalingcho, “Ninglang liba Tsingrang-nü ihrü khyang kohsohnung. Ihrü Abi dikehrüti ko ihrünü thsanung dikehre. Ta Jerusalem la nührü thsiking ko nührü ara tu mühle.”