NEHEMIA 10 - AMÜSA BAIBEL (BSI)

¹ Hütsüla akhudiba tsü Hakalia tsurü governor Nehemia ko Zedekia nyühnü thrahcho. Hütsüpü hirinü thrahcho: Seraia, Azaria, Jeremia, Pashur, Amaria, Malkija, Hatush, Shebania, Maluk, Harim, Meremot, Obadia, Daniel, Ginethon, Baruk, Meshulam, Abija, Mijamin, Mazia, Bilgai ko Shemaia. Azania tsurü Jeshua, Henadad tsutpu lanü Binnui, Kadmiel, Shebania, Hodia, Kelita, Pelaiah, Hanan, Mika, Rehob, Hashabia, Zakur, Sherebia, Shebania, Hodia, Bani, ko Beninu. Parosh, Pahath, Moab, Elam, Zatu, Bani Buni, Azgad, Bebai, Adonija, Bigvai, Adin, Ater, Hezekia, Azzur, Hodia, Hashum, Bezai, Harif, Anathot, Nebai, Magpiash, Meshulam, Hezir, Meshazabel, Zadok, Jadua, Pelatia, Hanan, Anaia, Hoshea, Hanania, Hashub, Halohesh, Pilha, Shobek, Rehum, Hashabna, Maseia, Ahia, Hanan, Anan Maluk, Harim ko Bana.

Bebürüti: Levirü: Langnürüti: Anyengchotaba

²⁸ Ihrü Israelrü, Bebürü, Levirü, amübükuh nyahrü, amübükuh la khithsarü, amübükuh thsarü ko Tsingrangba Yuzeng bichirü aparü atümungnü ihrü lih la lirü shuparü tenü zako. Ihrü ko ihrü nitpürü ko yu nyichehrülü ihrü tsurü mii zeh,

²⁹ Ihrünü hi thsangnyangkhang chokehchola lilepü Tsingrangba-nü Abi dikehrü Mosa khu jücho Yuzeng roh-i linung, ihrü Abüdongba-nü mülacho apüm bichinung, ko ihrünü Abi yuzeng ko amülaba apüm bichinung, ihrü langnürü te zeh ihrünü yuchümre.

³⁰ Ihrünü ihrü lih la liba shuparü te kuthriyangthri müthsanung.

³¹ Shuparünü Amünyümong mahkhang apa Amüsa nyümong ihrü yang fürü mahkhang apa tunang dusü ainung hironye, ihrünü arüh khehlanü mülihnung. Kang dhünyeh mükhu ihrünü luh müthsanung ko ihrünü thsite apüm pehjünung.

³² Kang mükhu Amübükuh dhsütah shulüm ihrü nyitsarü müipinü taripi süreh münga-nga jünung.

³³ Ihrünü amübükuh mübü shulüm hiri jünung: Amüsa hümdhse, nyümong mükhu jüba fürü amübü, nyümong mükhu tah mübüba kanglungrü, amünyümong nengdang Amüsa amübü, Chonu Asi Thsüti ko apa thsütiti apa Amüsa amübü, Israelrü münyi hitsiba amübü ko Amübükuh nengdang apa dhsütah apüm.

³⁴ Ihrü müyurü, bebürü ko Levirünü Yuzengnü mülacho roh-i sürü hungnü Abüdongba Tsingrang khyang kangmübü tahnung sing khyübülungnung kang mükhu zii thsadhing throchehnung.

³⁵ Kang mükhu ihrünü ihrü maxacho lanü akhudiba fürü ko ihrü singsidong chahnü akhu nyicho Amübükuh yang hiwünung.

³⁶ Yuzeng la licho roh-i, ihrünü ihrü tsuzarü yola aukhuba Amübükuh la bebürü yang Tsingrangba khyang müsachehsohnung hiwünung. Ihrünü ihrü misü, san ko miza müipi chahnü akhu mütrüba aza khakhuchüjünung.

³⁷ Ihrünü Amübükuh la bebürü yang ihrü yuthsahchehcho lanü akhudiba külüpcho hüm ko yongkha, olive tuji ko singsilungsi adhangpi hiwünung. Ihrünü Levirü yang ihrü tsahma lanü dhüre nohlüm hiwüjünung, tunüo luthsaba yangdongtila arühnü khyübülungre.

³⁸ Aron chahnü trahchocho bebürüti tsü dhüre nohlüm khyübülungde Levirü yola linung ko arühnü khyübülungcho yolanü nohlüm khüdu Levirünü Amübükuh dhsütah nengdang amübükuh la azahkehsing yang hiwünung.

³⁹ Amübü khyübülungcho fürü, yongkha ko olive tuji tsü amübükuh la shingtbhürü zahkehchah, bebürü dikehchah ko amübükuh nyahrü ko khithsarü liji yangnü Israelrü ko Levirünü hiwünung. Ihrünü ihrü Tsingrang kuh müthrüchahchüpehnung.