NAHUM 2 - AMÜSA BAIBEL (BSI)

Nineve Khülucho

¹ Nineve, nührü betiko! Nüh shühchijünung tase tsü roko. Athsehnung nyitsarü wüsohng! Lang nyahtisohng! Khata nengdang rungnüm!

² (Arorühnü mükohcheh-ede hiba Israel ahechi, Abüdongba-nü thali jünung thsako.)

³ Rothsarü arorüh tsünü tsung amoh bire ko jengki amoh khyüre. Arühnü benung rungnümre! Arüh akhüluba michang kyo tehre. Arüh kuriti khyachire!

⁴ Kuri akhülubanü yanglongla khyachi rachire, Yangdi yanglongla wüli roli shangchire. Arühnü livi kyo tehre ko tsingchi kyo mülakehre.

⁵ Anüchirüti dsimükhongre; arühnü bekhu wüde müthikehre. Arühnü tbülang tsü tsohkhuta würe, ko tsung tsü müdongre.

⁶ Tbükhüm shündhün yongkhi tsü tsohphohre; Yangthsaba pümji adrünü jengre.

⁷ Yangthsalatpü rang hitsire; kulirütinü mümüdhrü kyo meshüre ko awahchonü arüh dreng la hamchire.

⁸ Kihting rohphohde kyo, Nineve lanü nyitsarü tsohkhutare, arühnü züdere, “Nyehlieng! Nyehlieng!” Ta sünüsü müximülare.

⁹ Taripi tsü kengchoung! Hon tsü kengchoung! Yangdi tsü kuthsinü jeng lile.

¹⁰ Nineve khüluko, tsishoko, nayingko! Adrüchonü lasih shenahre; Mükhong dhridhrire, tase kingkare; romih pha-a kangre.

¹¹ Kihkhünying kuh, kihkhünyingza mükhichehchah, Apung ko atpa mühlinye aza khümcho lichah kyoba yangdisü ade khülo-o?

¹² Kihkhünyingnü atrüh ko aza nengdang kanglungrü mükahseh zangzang rehnah akuh jengsohcho.

¹³ Akohba Abüdongba-nü yore, “Ih nü rorüh!” “Ihnü nü akhüluba tahpehjünung. Nü rothsarüti khatala süsohnung, ko nühnü bürü yo rohchocho apüm Ihnü khyünung. Limih la nü tase müyuchipehnung.”