MISHACHO 9 - AMÜSA BAIBEL (BSI)

¹ Hütsünü ninglang riwürü amüngaubanü abi rühti mehcho. Hütsüde püti khüdu limih chah longcho Ihnü ngucho, ko abi khyang jongnah müliba shukuh azihsing jücho.

² Püti tsünü jongnah müliba shukuh tsü khangthrucho, ko hütsü lanü mikhukhi amülah lanü kyo mikhu chürocho; ko hiba shukuh mikhu tsünü nyü ko nyübong marürahsohcho.

³ Ko mikhu la tsünü limih chah khengqu pohchehcho, ko arüh khyang khakikoh re akyokyo jücho.

⁴ Arüh te zanu mahkhang singdong mahkhang rangva tu mükhingchinung; ta sürü kikhang chah Tsingrangba amüdhethsa shingcho mükehro arüh du khingchinung yocho.

⁵ Hiri nyitsarü khengqu khyang choo münga dhsümthsenung chah khu arüh müpsehnung mümülacho. Dhsümthseba adhsa tsü khakikohnü mükyahcho adhsa kyo lile.

⁶ Hiba choo münga shikhela tsü arühnü asünung yangchinung, ta hütsü müngunung; arühnü sünyünung ta asübanü arüh tenü tsinung.

⁷ Khengqu adhingnung tsü kuri rothsanung rungnümcho kyo licho; arüh thah chah hon kuthri kyo licho, ko arüh romih tsü nyitsarü romih kyo licho.

⁸ Arüh kuva khingkurü kuva kyocho, ko arüh ha kihkhünying ha kyocho.

⁹ Arüh dreng tsü idhse drenghap kyobanü khyüdi licho, ko arüh qo yuva tsü khata yang shangba kuri akhülusing khütango yuva kyo licho.

¹⁰ Khakikoh kyo arüh müying ko münyüh kehcho, ko choo münga nyitsarü khingchinung arüh zii arüh müying chah kehcho.

¹¹ Ajongnah müliba shukuh riwürü tsü arüh michah yangthsaba thsacho. Abi neng Ibri yula Abaddon, ko Greek yula Apolleon licho (adüzü “Achangjürü”)

¹² Akhudiba adrünung khuko; hi khanglang adesü adrünung anyüh lile.

¹³ Hütsüpü ninglang riwürü dhüroh-ubanü abi rühti mehcho. Ko Tsingrangba bete yaba hon bholu jongnah müyülangnü yuva chürocho Ihnü yuchicho.

¹⁴ Yuva tsünü ninglang riwürü dhüroh-uba te yocho, “Eufrates yongkhi arangcheh la khangti liba ninglang riwürü müyü tsü lehchehng!”

¹⁵ Ninglang riwürü müyü tsü müthehcho; arühnü amüi tsurü chang asangla khüdu, hiba rehtseh, hiba nyümong, hiba choo ko hiba kang la müpsehnung nengdang rungnüm licho.

¹⁶ Kuri chah pümrü rothsarü tsü million thsih anyüh lichoepü yocho.

¹⁷ Ko I müngucheh la kuri ko hütsüri chah pümrüti Ihnü ngucho: Arüh drenghap tsü michang kyo amoh, Safir kyo apuleh ko miphoh kyo amüyeng licho. Kuriti thah tsü kihkhünying thah kyo licho ko arüh be lanü michang, mikhu ko miphoh chürocho.

¹⁸ Kuriti be lanü chürocho michang, mikhu ko miphoh hiri asang tsünü amüi tsurü chang asangla khüdu changjücho.

¹⁹ Tunüo Kuriti zii tsü arüh be la ko amüying la licho. Arüh müying tsü mürü kyo athah kehcho, ko hütsürinü nyitsarü dhsakehjücho.

²⁰ Hiri adhsanü mümüpsehcho amüi tsurü anyingcho atümung tsünü arühbürünü nguchicho lanü lasih müthsamülacho. Ngunung, yuchinung mahkhang tsehnung mükohba motsing, hon kyothri, taripi, imüyeng, lung ko sing hiri mübüba arühnü müpehjücho.

²¹ Mahkhang arühnü nyitsarü müpsehba, ziimongba, nahtrahnaxengba, mahkhang fühba, hiri lanüsü lasih müthsamülacho.