MISHACHO 8 - AMÜSA BAIBEL (BSI)

Adhünyeh-u Ashingsing

¹ Khode Sanza tsünü dhünyeh-uba ashingsing tsü rohphoh khangthrucho, hütsüde ninglang yanglih la rehtseh achangsho naying kangcho.

² Hütsüde Tsingrangba bete yaba ninglang riwürü dhünyeh Ihnü ngucho ko arüh khyang rühti dhünyeh jücho.

³ Ko müchiji tahsing hon tbhü biba ninglang riwürü khüdu ro bholu te yacho. Yangthsaba pümji bete liba hon bholu chah amüsarüti atümung dangkhidangnangde yohjüsohnung abi khyang müchiji khütango jücho.

⁴ Tsingrangba bete yaba ninglang riwürü kheh la tsünü mikhu tsü amüsarü dangkhidangnang yola küducho.

⁵ Hütsüpü ninglang riwürü tsünü müchiji tahsing tsü khyonü bholu chahnü michang khyo jengsohpü limih yang dhichahchücho. Hütsüde ningki yuva rengreng, ningmüla ko alihyo zingba licho.

Rühti

⁶ Hütsüde ninglang riwürü dhünyeh tsünü rühti dhünyeh biba tsü mehnung rungnüm licho.

⁷ Akhudiba ninglang riwürü tsünü abi rühti mehcho. Hütsüde ashüh te yohrütapü shurü ko michang limih chah jürocho. Hütsünü limih chang asangla khüdu, singdong chang asangla khüdu ko za axeng apüm tahpehcho.

⁸ Hütsüpü ninglang riwürü anyüubanü abi rühti mehcho. Azong arangcheh michangnü tahyacho kyo kihdi la dhiyohchücho. Kihdi chang asangla khüdu ashüh kangpehcho.

⁹ Kihdi la kanglungrü chang asangla khüdu sopehcho, ko Kihkuh chang asangla khüdu thsangnyangpehcho.

¹⁰ Hütsüpü ninglang riwürü asangubanü abi rühti mehcho. Hütsüde ninglangnü püti arangcheh khüdu dsi kyo tahkehpü yongkhi chang asangla khüdu ko kihnatungti michah longcho.

¹¹ Püti aneng tsü “Akha.” Hütsüde kih chang asangla khüdu akha kangpehcho, ko hütsü akha kangchonü, hütsüba kih yongrü adrong sücho.

¹² Hütsüpü ninglang riwürü müyüubanü abi rühti mehcho. Hütsüde nyü chang asangla khüdu, chonu chang asangla khüdu, ko chenghi chang asangla khüdu chah shingkehcho; hütsünü arüh atsingse chang asangla khüdu changpehcho; ko nyümong chang asangla khüdu ko ama chang asangla khüdu atsingse changpehcho.

¹³ Hütsüpü Ihnü dhingcho, ko ningwüm la müdi khüdu yuva amülah khong mongchicho Ihnü yuchicho. “O ahohah! Ahohah! Ninglang riwürü apa asangnü mehnung liba rühti lanü yuva rode limih chah lirü nengdang khütoh-i adrünung thsanung!”