MISHACHO 7 - AMÜSA BAIBEL (BSI)

Israelrü 144,000

¹ Hütsüpü, limih mahkhang Kihdi mahkhang singdong tu chahsü tu nyübongnü müfükehnung nengdang, nyübong müyü tsü rangli, limih jongnah müyülang yaba ninglang riwürü müyü Ihnü ngucho.

² Ninglang riwürü apa khüdu akang Tsingrang ashingsing bipü nyüchüro langnü chüro Ihnü ngucho. Abinü yuva amülahnü ninglang riwürü müyü sürü khyang limih ko Kihdi thsangnyangsohnung tase jücho, arüh dsicho.

³ Ninglang riwürü tsünü yocho, “Ihrünü ihrü Tsingrang dikehrü kikhang chah amüdhethsa müshingkehde, nührünü limih, kihdi mahkhang singdong tükhingchi.”

⁴ Ko Tsingrangba amüdhethsa arüh kikhang chah shingkehrüti tsü arüh 144,000 lilepü Ite yocho. Arüh tsü Israel hung dhüreanyüh lanü.

⁵ Juda hung lanü 12,000, Reuben hung lanü 12,000, Gad hung lanü 12,000,

⁶ Asher hung lanü 12,000, Naftali hung lanü 12,000, Manase hung lanü 12,000,

⁷ Simeon hung lanü 12,000, Levi hung lanü 12,000, Isakar hung lanü 12,000,

⁸ Zebulun hung lanü 12,000, Josef hung lanü 12,000, Benjamin hung lanü 12,000.

Sühdi Arangcheh

⁹ Hütsüpü Ihnü dhingde sühdi arangcheh khüdu sünüsü mükhichehba nyitsarüti ngucho! Arüh tsü anah, ahung, limih ko yucho mükhu lanü licho, ko arühnü jengki athru khyüpü arüh kheh la Seva bipü Sanza yangthsaba pümji bete yacho.

¹⁰ Arühnü züde yocho: “Akangcheh tsü yangthsaba pümji la pümba Ihsa Tsingrang, ko Sanza chahnü rore!”

¹¹ Ninglang riwürü atümungnü yangthsaba pümji, azirüti ko akang kanglungrü müyü mükang yacho. Hütsüpü arühnü yangthsaba pümji bete mükhukeh Tsingrangba mübü yocho,

¹² “Amen! Anengse, ahechi, lümlong, nengse jüba, adhichi, zii ko akohba apüm Ihsa Tsingrang te müchangkapü thsaang! Amen.”

¹³ Azirüti yola khüdunü Ite tsingdhingcho, “Jengki athru khyürü hi sürüo, ko arüh khüdenü rocho?”

¹⁴ Ihnü lalingcho, “Ihnü mümüdhe, nühnü müdhele, adirü!” Abinü Ite yocho, “Hiri nyitsarüti hi adrünung dhsümthsedhsümloh lanü khümcho rorüti lile. Arühnü arüh jengki Sanza shüh la thsütoh thru kangsohko.

¹⁵ Hütsünü arühnü Tsingrangba yangthsaba pümji jingte linü, ama atsingse abi dikehre. Yangthsaba pümji la pümbanü abi ziinü arüh khümchonung.

¹⁶ Arüh adelü khodesü müyangnung mahkhang müxonung; nyünü mahkhang tu adhsanü arüh mütahnung,

¹⁷ tunüo yangthsaba pümji alongla liba Sanza tsü arüh san nyahrü thsanung, ko abinü akang kih yongna yang arüh nünung. Ko Tsingrangba-nü arüh nah lanü nahshükih nipehjünung.”