MISHACHO 6 - AMÜSA BAIBEL (BSI)

Ashingsing

¹ Hütsüde Sanza tsünü ashingticho dhünyeh yola akhudiba tsü rohphoh khangthrucho Ihnü ngucho, ko akang kanglungrü müyü yola khüdunü ningki yuva la “Rung” ko yocho Ihnü yuchicho.

² Ihnü dhingcho, ko hütsüla kuri athru khüdu licho. Hütsü chah pümba tsü singthsalu khüdu bicho, ko abi khyang kuthri khüdu jücho. Abinü athrungrü khüdu kyo mahnung wücho.

³ Hütsüpü Sanza tsünü ashingtiba anyüu tsü rohphoh khangthrucho; ko anyüuba akang kanglungrü tsünü “Rung” pü yocho Ihnü yuchicho.

⁴ Kuri amoh apa khüdu chürocho. Hütsü michah pümba khyang nyitsarü khüdunü khüdu kyüsehtasohnung limih la rothsa hironung tase jücho. Abi khyang nohsheng amülah khüdu jücho.

⁵ Hütsüpü Sanza tsünü ashingticho asangu tsü rohphoh khangthrucho; ko asanguba akang kanglungrü tsünü “Rung” pü yocho Ihnü yuchicho. Ihnü dhingcho ko hütsüla Kuri anyah khüdu licho. Hütsüla pümba kheh la tsü ahosing khüdu bicho.

⁶ Akang kanglungrü müyü yola tsünü Ihnü yuchinü yuva khüdu chürocho, “Nyümong khüdu nyükheh ngang litoh süreh khüdu, ko lüdi süreh asang. Ta olive singdong ko shükusiluh tüthsangnyang!”

⁷ Hütsüpü Sanza tsünü ashingticho amüyüu tsü rohphoh khangthrucho; ko amüyüuba akang kanglungrü tsünü “Rung” pü yocho Ihnü yuchicho.

⁸ Ihnü dhingde hütsüla Kuri apuleh khüdu licho. Hütsü chah pümba neng tsü Asüba ko asü yang abi shündhün iiwücho. Ko rothsa la, yangkongnü, adhsaranü, ko rangmü kangdinü süsohnung arüh khyang limih nohlüm müyü la khüdu michah tase jücho.

⁹ Hütsüpü Sanza tsünü ashingticho amüngau tsü rohphoh khangthrucho. Tsingrangba yu sobhocho ko yuje cho yuzithsacho nengdang müpsehcho anbüti bholu pohki tsü Ihnü ngucho.

¹⁰ Arühnü yuva amülahnü züdecho, “Amüsa ko yuje, Akohba Abüdongba! Limih la lirü yukhanung ko ihrü müpsehrü rühyangnung nühnü khütoi münu linung?”

¹¹ Arüh müipi khyang jengki athru jücho, ko arüh müjang dikehrüti ko arüh jünirüti arüh roh-i mümüpsehkhangde, azachah kyahshang yingnung arüh te yocho.

¹² Ko Sanza tsünü ashingticho adhüroh-u tsü rohphoh khangthrucho Ihnü ngucho. Hütsüde alihyo atrehdi zingcho, ko nyü tsü arangshü roh-i anyah kangcho, ko chonu tsü ashüh kyo amoh kangcho.

¹³ Ko nyübong amülahnü füde ngurüsih ashüh shohjocho kyo chenghiti limih la shohjocho.

¹⁴ Ko ning tsü thrahloh lohcho kyo lohtsang tsicho, ko azong ko mütro apüm palu alichahnü shehmüi tsicho.

¹⁵ Hütsüde limih yangthsarüti, amülahrüti ko anüchirüti, alirü ko athrungrüti ko ayurü ko nyüje nyitsarüti atümungnü lungkoh ko azong lihkhi pohki arüh jangjang rangcho.

¹⁶ Arühnü azong ko lung te yocho, “Ihrü michah shohjoung ko yangthsaba pümji la pümba romih tenü ko Sanza rihlong chüroba lanü ihrü rangsohng!

¹⁷ Tunüo arüh rihlong chüroba nyümong tsü ro lile, ko sünü hütsü bete yachehnung?”