MISHACHO 5 - AMÜSA BAIBEL (BSI)

Thrahloh ko Sanza

¹ Yangthsaba pümji la pümba tsalangthring alohcho khüdu Ihnü ngucho; hütsü anyüdinglang thrahpü ashingsing dhünyehnü shingtipü licho.

² Ko akohba ninglang riwürü khüdunü yuva amülahnü züde Ihnü ngucho, “Ashingticho thsangnyang thrahlohcho tsü khangthrunung sü dekhing liro?”

³ Ta thrahloh tsü khangthru dhingnungthsa ninglang yanglih la mahkhang alimih chah mahkhang alih yonglang süsü mülicho.

⁴ Thrahloh tsü khangthruchehnung mahkhang hütsüla dhingnung adekheng süsü münguchonü Ihnü longriyoh tracho.

⁵ Hütsüde azirü yola nyüh khüdunü Ite yocho, “Tütra. Dhing! Juda hung lanü David chahnü trahchocho kihkhünying khüdunü akoh tsü nguko, ko abinü ashingtiba dhünyeh tsü khangthruchehle.”

⁶ Hütsüde yangthsaba pümji longla akang kanglungrü müyü ko azirütinü mükangtipü sanza khüdu ya Ihnü ngucho. Sanza tsü amüpsehcho roh-i ngucho. Hütsü limih apümlang müthehchüba Tsingrangba anbü dhünyeh roh-i ajüh dhünyeh ko anahtse dhünyeh kehcho.

⁷ Sanza tsünü wü yangthsaba pümji la pümba tsalang kheh lanü thrahlohcho tsü khyücho.

⁸ Abinü hütsüta khyüde, akang kanglungrü müyü ko azibarü mükyüpü müyü tsünü Sanza bete mükhukehcho. Arüh müipi ikhong khüdu-khüdu ko müchijinü jeng liba hon tbhü khüdu-khüdu licho, hiri tsü amüsarü dangkhidangnang licho.

⁹ Arühnü khi asi khüdu thsacho: “Thrahlohcho tsü khyo ashingticho tsü khangthrunung nüh adekheng. Tunüo nüh müpsehcho, ko nüh sücho khu ahung, yucho, limih ko atrah müipi lanü Tsingrangba khyang nühnü nyitsarü lihchehjüko.

¹⁰ Ihsa Tsingrangba dikehnung nühnü arüh bebürü yanglih khüdu külüpjüko, ko arühnü limih la yangthsanung.”

¹¹ Ihnü thali dhingde, ninglang riwürü hajarnü hajar ko mükhilong yuva yuchicho. Akang kanglungrü müyü ko azibarütinü yangthsaba pümji mükang yapü,

¹² yuva arangchehnü khi thsacho: “Amüpsehba San zanü azi, kuthsi, lümlong ko re adhichi, ahechi ko anengse ngunung adekheng!”

¹³ Ko ninglang, alih la ko alih yonglang ko kihdi la, lihküp la akang apümnü khi thsacho Ihnü yuchicho: “Yangthsaba pümji la pümba ko Sanza te, müchangkapü anengse ko adhichi ahechi ko akohba thsaang!”

¹⁴ Akang kanglungrü müyü tsünü lalingcho, “Amen!” Ko azirüti tsünü mükhukeh mübücho.