MISHACHO 4 - AMÜSA BAIBEL (BSI)

Ninglang Yanglih la Amübü

¹ “Hütsüpü müngucheh apa khüdu ninglang yanglih la kukhang khüdu khangthrucho Ihnü ngucho. Ko rühti kyo khongba yuva khüinü akhudi Ite chotacho hütsünü yocho, “Hila kürung ko hiko tuturü tikehnung Ihnü nüte ngusohnung.”

² Hütsüde Anbünü Ih jengcho. Ninglang yanglih la tsü yangthsarü pümji khüdu chah nyüh khüdu püm ngucho.

³ Aromih tsü thsidilung Jasper ko Karnelian kyo riricho, ko yangthsaba pümji mükang tsü emerald ayah kyonü mürükengkengnü mükangti licho.

⁴ Yangthsaba pümji tsü mükangmüla apa yangthsarü pümji mükyüpü müyü licho, ko hütsürila jengki athru khyüpü ko hon kuthri thripü azirü mükyüpü müyü pümcho.

⁵ Yangthsaba pümji la tsünü ningmüla ko ningki yuva rengreng chürocho. Yangthsaba pümji bete tsü atahkehcho dsibhong dhünyeh tru yacho, hütsü Tsingrangba Anbü dhünyeh licho.

⁶ Adesü yangthsaba pümji bete tsü tsahrising ariri kihdi khüdu kyo licho. Yangthsaba pümji mükangmüla khanglang belang anahtsenü jengpü kanglungrü müyü licho.

⁷ Akhudiba tsü kihkhünying kyocho; anyüuba tsü misüpung kyocho; asanguba romih tsü nyitsarü romih kyocho, ko amüyüuba tsü müdi mong rachide kyocho.

⁸ Kanglungrü müyüding tsü aqo dhürüroh kehcho, ko amilang ayonglang anahtsenü jeng licho. Ama atsingse arühnü mütozah khi thsacho: “Amüsa, amüsa, amüsa, Akohbong Abüdongba Tsingrang, Sü licho, sü liro ko sü aronung liro.”

⁹ Akang kanglungrü müyü tsünü ahechi ko adhichi khi thsa yangthsaba pümji la pümba, sü lede lidu liro abi khyang anengse jüre. Arühnü hütsüta thsade,

¹⁰ Yangthsaba pümji la pümba, lede lidu liba bete tsü azirü mükyüpü müyü tsünü mükhukeh mübüre. Yangthsaba pümji bete tsü arühnü arüh kuthri phungchopü yonung,

¹¹ “Ihrü Abüdongba ko Tsingrang! Ahechi, adhichi ko zii ngunung nüh adekheng. Tunüo nühnü lüpcho thricho, ko nühnü lümchonü arüh khyang akang jücho ko lisohre.”