MISHACHO 3 - AMÜSA BAIBEL (BSI)

Sardis yanglang Yusi

¹ “Sardis la Lithro riwürü yang thrahng: “Tsingrangba Anbü dhünyeh ko chenghi dhünyeh libong chahnü yusi tsü hi lile. Nü nguchi Ihnü müdhele; aneng du nüh akang, ta nüh asücho lile.

² Hütsüeko jesung, ko nü liba tsü mütrühchode rezehsohng. Tunüo I Tsingrang jingte nü nguchi dekhing müngu.

³ Hütsüeko nüte khüta docho, ko nühnü tu nyisicho hütsü lümchehng; hütsü bichieng ko lasih thsamülang. Nührü müjesukhang Ih nüh yang aführü khüdu roh-i ronung, ko Ih khode ronungnang nühnü bekhyah tsü mümüdhenung.

⁴ Ta Sardis la lirü nührü khürünü nührü jengki müsa yohpüko. Nührünü jengki athru khyüpü I yola tsehnung, tunüo nührü adekheng.

⁵ Sürünü kohro hi kyo athru khyünung ko akang vakha lanü Ihnü arüh neng münipehnung, I U ko abi riwürüti bete arüh I yoepü Ihnü misha nyengchonung.

⁶ “Lithroti te Anbünü tu yoro, nührü nangku kehkhang nyieng!

Filadelfia yanglang Yusi

⁷ “Filadelfia la Lithro riwürü yang thrahng: “Amüsa ko yujebong chahnü yusi tsü hi lile. Abi kheh la David yo azihsing zehle, ko khode abinü kukhang khüdu khangthrunang, sünüsü hütsü mükhangticheh, ko khode abinü hütsü khangtinang, sünüsü hütsü mükhangthruchehre.

⁸ Nü nguchi Ihnü müdhele; nü tase aikyah lilepü Ihnü müdhele; nühnü I adoba bichinü Ite yuje cho licho. Sünüsü mükhangtichehnungthsa Ihnü nü bete kukhang khüdu khangthrujo lile.

⁹ Dhing! Motsing yoti nengdang, sürünü arahkheh arüh Jihudarüepü yoro, Ihnü arüh rosohnung ko nü jingte mükhukehsohnung. Ihnü nüh müilepü arüh atümungnü müdhenung.

¹⁰ Nühnü I yu nyi rangchochonü, limih chah nyitsarüti thsadsünung lihküp la ronung liba chongcha lanü Ihnüsü nüh khümcho yohpünung.

¹¹ Ih zah rore. Nü akoh kuthri sünüsü mükengchonungthsa, nüh tu liro hütsü khahkhah yümpung.

¹² Sünü kohro abinü I Tsingrang kuh la Ihnü dongdi khüdu kangsohnung, ko hütsüla tsünü abi khodesü müshehnung. Ihnü abi chah I Tsingrang neng ko asi Jerusalem I Tsingrang yangdi neng khüiba I Tsingrang chahnü ninglangnü jüronung, hütsü thrahnung. Ihnü abi chah I neng asi sü thrahnung.

¹³ “Lithroti te Anbünü tu yoro, nührü nangku kehkhang nyieng!

Laodicea yanglang Yusi

¹⁴ “Laodicea la Lithro riwürü yang thrahng: “Amen, sü longlangcheh ko yuje yuzi, sü Tsingrangba-nü thricho yola ayingba liro abi chahnü yusi tsü hi lile.

¹⁵ Nü nguchi Ihnü müdhele; nüh adhsasü mah arühsü mah. Nüh khüdu mahkhang khüdu thsasohnyüre!

¹⁶ Nüh adhsasü mah arühsü mah, ta mülushüsheh thsachonü, Ihnü nüh I be lanü mülüpehnung!

¹⁷ ‘Ih alirü, kükyüko, ko tunü mümüdsi pü nühnü yore’ Ta nüh khütoh-i aroto ko amüinung akangnang nühnü mümüdhe! Nüh ailümrü, tbhüdeng ko anatoh lile.

¹⁸ Hütsünü nüh alirü kangnung nengdang amüdhseng hon I chahnü lihnung thsüchire. Nüh tbhüdeng ko ashahkhyü lanü lüptinung nengdang athru shü lihng. Nühnü ngunung nengdang nü nahtse la amüyühnung moisü lihng.

¹⁹ Khütoi te Ihnü müiro arüh te Ihnü yübüre, ko khingchire. Hütsüeko nühnü longphi lasih thsamülang.

²⁰ Dhing! Ih Kukhang te yapü hamchire; khürünü I yuva yuchi kukhang khangthrujükhang, Ih abi kuh la züdunung, ko abi yola tsuyongnung ko abi I yola tsuyongnung.

²¹ Ihnü kohpü ade I U te abi yangthsaba pümji la pümcho kyo, sünü kohro abi Ite yangthsaba pümji la pümsohnung.

²² “Lithroti te Anbünü tu yoro, nührü nangku kehkhang nyieng!