MISHACHO 22 - AMÜSA BAIBEL (BSI)

¹ Ninglang riwürünü akang kih shurülung kyo ariri, Tsingrangba ko Sanza pümji lanü chüro

² Yangdi yanglong la pohba yongkhi tsü Ite ngusohcho. Yongkhi bekhüm anyüdinglang kang la choo mükhu, singsih dhüreanyüpi sihba akang singdong tsü yacho; ko ava tsü yuchoti kyangnung nengdang licho.

³ Hiba yangdila Tsingrangba-nü chokehcholacho tusü müngunung. Hiba yangdila Tsingrangba ko Sanza yangthsaba pümji linung, ko abi dikehrünü abi mübünung.

⁴ Arühnü abi romih ngunung, ko abi neng arüh kikhang chah kehnung.

⁵ Hütsüla aromang mülinung, ko arühnü dsi mahkhang nyü atsingse müdhsütahnung, tunüo Abüdongba Tsingrang tsü arüh atsingse thsanung, ko arühnü müchangkapü thsanung.

Jisu Rocho

⁶ Hütsüpü ninglang riwürünü Ite yocho, “Yu hiri yuje ko ayudsinung. Ko Abüdongba Tsingrang sünü azikehrüti khyang apu nbü jüro, tu zah tikehnung liro, abinü hütsü abi dikehrüti te ngusohnung abi riwürü müthehko.”

⁷ Jisu-nü yore, “Dhing, Ih zah rore! Sünü hiba vakhala choyohchoti bichinang abi amüwanung!”

⁸ Ih, Johan-nü, hiri apüm yuchicho ko ngucho. Ko Ihnü hiri yuchi ko ngukade, Ite hiri ngusohba ninglang riwürü jingte mükhukehcho ko abi mübünung yacho.

⁹ Ta abinü Ite yocho, “Hütsüta tüthsa! Ihsü nüh ko nü jünirü azikehrü ko hiba vakhala yocho yu bichirü atümung kyo dikehrü khüdu du lile. Tsingrangba du mübüng!”

¹⁰ Ko abinü Ite yocho, “Hiba vakhala choyoh yu hi rang tüyohbü, tunüo hiri apüm tikehnung becho chihle.

¹¹ Sü mütsaro abinü mütozah amütsa nguching, ko sü mümüsaro abinü mütozah mümüsa lieng; sü atsa liro abinü mütozah atsa nguching, ko sü amüsa liro abinü mütozah amüsa nguching.”

¹² Jisu-nü yocho, “Dhing! Ih zah rore! Nyitsarü müipi palu nguchi aichi jünung Ihnü jiyü hironung.

¹³ Ih Alfa ko Omega, adikeh ko achangka.”

¹⁴ Sürünü akang singdong chahnü singsih tsuchehnung ko yangdila tbükhüm khu züduchehnung nengdang arüh jengki thsütohro arüh amüwanung.

¹⁵ Ta yangthsihlang tsülü amünyirü, azi-amongrü, mabomashirü ko amüpsehrü, kyothri mübürü ko yu la ko nguchila arahkhehrüti du lile.

¹⁶ “Ih, Jisu-nü lithroti te hiri nengdang nührü te yonung I ninglang riwürü müthehchüko. Ih David chahnü trahchocho, Ih anyangnyü atsingse püti.”

¹⁷ Anbü ko Kulangwütpünü yore, “Rung!” Hi yuchirü müipinü “Rung” pü young. Sü xoro, rung; Sünü khyünyüro abinü amükangnü akang kih khyüng.

Yuzika

¹⁸ Ih, Johan-nü, hiba vakha la choyoh yu yuchirü müipi te müzahsohre: Khürünü yu hirila lango throkehkhang, hiba vakhala thrah liba akhingchi wara tsü hütsüvi chah Tsingrangba-nü throkehjünung.

¹⁹ Ko khürünü hiba vakha choyoh yuti lanü lango pehkhang, hiba vakha la thrah liba akang singdong singsih ko Amüsa Yangdi lanü Tsingrangba-nü abi nohlüm pehnung.

²⁰ Sünü yu hiri yuzi jüro abinü yore, “Ho ajüje! Ih zah rore!” Amen. Abüdongba Jisu rung!

²¹ Abüdongba Jisu achomang nührü atümung te lieng. Amen.