MISHACHO 21 - AMÜSA BAIBEL (BSI)

Ninglang Yanglih Asi ko Limih Asi

¹ Hütsüpü Ihnü ninglang yanglih asi ko limih asi ngucho. Akhudiba ninglang yanglih ko akhudiba limih müngupehcho ko kihdi changpehcho.

² Ko kulangwütpünü anii shirünung jengki khyücho kyo rungnümpü Amüsa Yangdi, asi Jerusalem tsü Tsingrangba chahnü ninglangnü jürochi Ihnü ngucho.

³ Ko yangthsaba pümji lanü yuva amülahnü yo Ihnü yuchicho: “Dhing, Tsingrangba kuh amüi tsurü te lile! Abi arüh yola linung ko arüh abi müyurü thsanung. Tsingrangba apu arüh yola linung ko abi arüh Tsingrang thsanung.

⁴ Ko arüh nah lanü nahshükih apüm abinü nipehjünung. Asüba, alongri mahkhang atraba ko adhsaba adelü mülinung. Ahiba khukhangko.”

⁵ Hütsüde yangthsaba pümji la pümba tsünü yocho, “Dhing, Ihnü apüm asi külüpre!” Abinü Ite hisü yocho, “Hi thrahng, tunüo hiri yu yuje ko ayudsinung.”

⁶ Ko abinü yocho, “Hi thümko! Ih Alfa ko Omega, adikeh ko achangka. Axorü khyang Ihnü amükangnü akang yongna lanü tinung.

⁷ Sünü kohro abinü I chahnü hi ngunung: Ih abi Tsingrang kangnung ko abi I tsurü kangnung.

⁸ Ta adrürü, kihyochürü, amünyirü, amüpsehrü, mabomashirü, azi amongrü, kyothri mübürü ko arahkhehrü atümung khyang anyüuba asüba, michang ko miphoh truyaba shukuh jünung.”

Asi Jerusalem

⁹ Ninglang riwürü dhünyeh yola khüdu, achangkaba wara dhünyehnü jeng liba shing dhünyeh bibanü ro Ite yocho, “Rung, Ihnü nüte kulangwütpü, Sanza Nitpü ngusohnung.”

¹⁰ Anbüla ninglang riwürü tsünü azong athseng chah Ih notuwücho. Abinü Jerusalem, Amüsa Yangdi, Tsingrangba ahechinü jeng,

¹¹ ninglangnü Tsingrangba chahnü jürochi Ite ngusohcho. Yangdi tsü thsidilung, Jasper kyo riri tehcho.

¹² Hütsü lungtbü arangcheh ko athseng, tbükhüm dhüreanyüh ko ninglang riwürü dhüreanyünü xüküm licho. Tbükhüm chah tsü Israelrü hung dhüreanyüh neng thrahkeh licho.

¹³ Apümlang tbükhüm asangsang licho: nyüchürolang asang, nyüzüdulang asang, kihku lang asang, ko kihjinglang asang.

¹⁴ Yangdi lungtbü tsü amüsa lung dhüreanyüh chah müdongkehcho, ko arüh müipi chah Sanza riwürü dhüreanyüh neng thrah licho.

¹⁵ Ite chotaba ninglang riwürü kheh la tsü yangdi, tbükhüm ko züdi kii dhingnung xuyang khüdu bicho.

¹⁶ Yangdi tsü müthung-mübhi shangrü du licho. Ninglang riwüba tsünü xuyang tsünü kii dhingcho: ko hütsü lutri 2,400 müthung-mübhi ko adilang shangrü du licho.

¹⁷ Ninglang riwürü tsünü lungtbü tsüsü kiidhingcho ko athsenglang khehap thsipü yürepü müyü thsacho.

¹⁸ Lungtbü tsü Jaspernü külüpcho ko yangdi tsü hon amüthsi tsahrising ariri kyonü külüpcho.

¹⁹ Ko yangdi lungtbü amüdongkeh tsü thsidilung langkhürunü yohrüta külüpcho. Akhudiba amüdongkeh tsü Jasper, anyüu tsü Safir, asangu tsü Agate, amüyüu tsü emerald,

²⁰ müngau tsü onyx, dhüroh-u tsü carnelian, dhünyeh-u tsü amüyeng quartz, keh-u tsü beryl, düku-u tsü topaz, dhüreu tsü chalcedony, dhürekheh-u tsü turguoise, dhüre anyüu tsü amethyst.

²¹ Tbükhüm dhüreanyüh tsü bhürüm dhüreanyüh, ko tbükhüm khüdu tsü üpüm khüdunü külüpcho. Yangdi yanglong tsü tsahrising ariri roh-i hon amüthsinü külüpcho.

²² Yangdi la tsü Ihnü amübükuh müngucho, tunüo Akohba Abüdongba Tsingrangba ko Sanza apu tsü amübükuh tsü lile.

²³ Yangdi la tsü nyü mahkhang chonu atsingse müdhsütah, tunüo Tsingrangba ahechi tsünü hütsüla vire, ko Sanza tsü hütsü yo atsingse lile.

²⁴ Limih nyitsarünü abi atsingse la tsehnung, ko alimih yangthsarünü hütsüla arüh ahechi hironung.

²⁵ Yangdi tbükhümti mükhyang khangthru linung; arüh khodesü mükhangtinung, tunüo hütsüla aromang mühle.

²⁶ Yuchoti ahechi ko adhichi hiba yangdila hironung.

²⁷ Ta amümüsa, ashahmükeh nguchirü, mahkhang arahkheh chorü süsü hiba yangdila müzüdunung. Sanza akang vakhala sürü neng thrah liro arüh du hiba yangdila züdunung.