MISHACHO 20 - AMÜSA BAIBEL (BSI)

Kang Hajar Khüdu

¹ Hütsüpü ajongnah müliba shukuh azihsing ko ixilih amüling khüdu bipü ninglang riwürü khüdu jürochi Ihnü ngucho.

² Ko abinü hiba dragon, ahi mürü, khüi Motsing mahkhang Satan liro, abi rangnü kang hajar khüdu nengdang rahcho.

³ Ninglang riwürü tsünü abi jongnah müliba shukuh la tsü rangyohcho, ko kang hajar khüdu müpide, abinü yuchoti mükiyohchüsohnung nengdang abi khangticho, ko hütsü shingticho. Hütsüpü azachah nengdang abi lehchehnung.

⁴ Yangthsarü pümji ko hütsüri chah pümrüti khyang yukhanung tase jücho Ihnü ngucho. Ko Jisu yuzi nengdang ko Tsingrangba yu nengdang süsohcho nbütisü Ihnü ngucho. Arühnü kangdi ko abi kyothri mümübücho, mahkhang arüh kikhang mahkhang kheh chah kangdi amüdhethsasü müshingsohcho. Arüh akang kanglicho ko kang hajar khüdu Khrista te yangthsacho.

⁵ (Anyingcho asürüti tsülü kang hajar khüdu tsü müpide kangli mürocho.) Hiba hi akhudiba asürü kangliroba lile.

⁶ Sürü akhudiba kangli roba la zehro, arüh akünyangnung ko khütang amüwa. Arüh michah anyüuba asüba zii tu mühle; arüh tsü Tsingrangba ko Khrista bebürü thsanung, ko abi te arüh kang hajar yangthsa thsanung.

Satan Kohcho

⁷ Kang hajar khüdu tsü khupü, Satan tsü jingkhehka lanü lehchehnung,

⁸ ko Gog ko Magog, lihküp la tsisho liba yuchoti kihyochünung abi wünung. Kibekhüm la lihpi roh-i, abinü khatanung arüh nübülungnung.

⁹ Ko arühnü limih jeng wücho ko amüsarü lichah ko abinü müiba yangdi tsü mükangticho. Ta ninglangnü michang jüro arüh changjücho.

¹⁰ Hütsüpü arüh khürahyohchüba motsing tsü, miphoh ko michang khüde kangdi ko arahkheh azikehba rangyohcho, hütsüla dhiyohchücho; ko ama atsingse achangka müli arüh khingchinung.

Achangka Yukhaba

¹¹ Hütsüpü yangthsaba pümji athru amülah ko hütsüla pümba Ihnü ngucho. Abi betenü ning ko alimih shehmüicho ko müngupehcho.

¹² Ko asürü amülah ko aikyah atümung yangthsaba pümji bete ya Ihnü ngucho. Vakhati khangthrucho ko apa vakha, akang vakha tsüsü khangthrucho. Ko hiba vakhala thrah licho roh-i, asürü palu nguchi aichi yukhacho.

¹³ Hütsüde kihdinü abükyü la liba asürü khakhuchüjücho. Ko nyitsarü atümung palu nguchi aichi yukhacho.

¹⁴ Hütsüpü asüba ko asü yang tsü michang shukuh la yohcho. (Hiba michang shukuh tsü anyüuba asüba.)

¹⁵ Sü neng akang vakhala thrah müngucho, abi michang shukuh la tsü rangyohcho.