MISHACHO 2 - AMÜSA BAIBEL (BSI)

Efesia yanglang Yusi

¹ “Efesia la Lithro riwürü yang thrahng: “Akheh tsalang chenghi dhünyeh bibong ko hon dsi müdongsing dhünyeh yola tsehchibong chahnü yusi tsü hi lile.

² Ihnü nü nguchi müdhele; nühnü khütoh-i müküp nguchicho ko rangchocho Ihnü müdhele. Nühnü münyirü te mürangchore ko riwürü mahko khüli riwürüepü yorü thsadsüdhingnü arüh arahkhehrüepü rangchehcho Ihnü müdhele.

³ Nüh arangcho, nühnü I khyanglangnü chongchako, ko nüh mükyah.

⁴ Ta Ihnü hi nengdang nüh nyümre: Nühnü akhudi roh-i Ih mümüi.

⁵ Hütsüeko nüh khütoi shu shehlicho lümdhing! Ko lasih thsamüla akhudi nguchiti tsü nguching. Nü lasih müthsamülakhang, Ih nüh yang ronung ko nü dsimüdongsing khyümüinung.

⁶ Ta Ihnü thrünyicho kyo Nikolasrü thrünyiba nü chah atsa khüdu kehle.

⁷ “Lithroti te Anbünü tu yoro, nührü nangku kehkhang nyieng! “Akohrüti khyang Ihnü Tsingrangba Tbü la sihba akang singdong sih tsusohnung.

Smerna yanglang yusi

⁸ “Smerna la Lithro riwürü yang thrahng: “Adikeh ko achangka, sü sücho ko akang liro, abi chahnü yusi tsü hi lile.

⁹ Ihnü nü chongcha ko iilümcho müdhele, ta yuje nüh alirü lile! Jihudarüepü arahkheh dsibarünü nüh nyüm chocho Ihnü müdhele; arüh motsing shangrüti lile!

¹⁰ Dhsükehnung liba chongcha nengdang tu tüdrü, Dhing! Nührü thsadsünung nengdang motsingnü khürü arangyoh la rangyohnung ko nührü chongcha tsü nyümong dhüre nengdang linung. Asü chii rangchoung, ko Ihnü nührü khyang akang kuthri jünung.

¹¹ “Lithroti te Anbünü tu yoro, nührü nangku kehkhang nyieng! “Akohrütilü anyüuba asübanü mükhingchinung.

Pergamum yanglang Yusi

¹² “Pergamum la Lithro riwürü yang thrahng: “Anyülangpü noh bibong chahnü yusi tsü hi lile.

¹³ Satan yangthsaba pümji khüdenü, liro hütsü Ihnü müdhele. Nüh Ite yuje cho lile, ko motsing lichah Ih longlangcheh yuzithsarü Antipas müpsehba chichahsü nühnü I chah nü yudsi müthrüchahchüpeh.

¹⁴ Ta nüh nyüm yu khürü lile: Balaam, sünü kyothri mübücho tsuyongba Israelrü khyang tsusoh ko mabomashi nguchisoh amünyi shitpahsohnung Balak te docho abi adoba khanglang iiwürü khürü nührü yola zehle.

¹⁵ Hütsü kyo nührü yola Nikolasrü adoba khanglang würü khürü zehle.

¹⁶ Ade nührü lasih thsamülang! Mahkhang, Ih nührü yang zah ronung ko I be lanü chüroba nohshengnü hütsüri nyitsarü nyüm khatanung.

¹⁷ “Lithroti te Anbünü tu yoro, nührü nangku kehkhang nyieng! “Akohrüti khyang Ihnü rang liba manna jünung. Adesü Ihnü arüh müipi khyang akhyüchorü chah khu sünüsü mümüdheba lung athru aneng asi thrahkehpü jünung.

Thyatira yanglang Yusi

¹⁸ “Thyatira la Lithro riwürü yang thrahng: “Tsingrangba Tsurü, sü nahtse mihmüle kyo ko sü jing asehcho imüyeng kyo ririro, abi chahnü yusi tsü hi lile.

¹⁹ Nü nguchi Ihnü müdhele. Ihnü nü müi, longlangchehba, dikehba, arangcho, ko akhudi tenü nühnü ade alaa nguchirepü müdhele.

²⁰ Ta hi nengdang Ih nüh nyüm lile: Khingkurü Jezebel, sünü abükyü Tsingrangba riwülarüepü dsiro, abükyü te nühnü rangchore. Abükyü adobanü I dikehrüti nahtrahnaxengsoh ko kyothri khyang mübücho tsuyongba tsusoh nümülare.

²¹ Lasih thsamülasohnung abükyü khyang bekhyah jüko, ta mabomashi lanü abükyünü lasih müthsamülanyüre.

²² Hütsünü chongnong khüdu chah Ihnü abükyü khülusohnung ko hütsüla abükyü ko abükyü te nahtrahnaxengrü khütang chongchanung.

²³ Abükyü khanglang iiwürüsü atümung Ihnü kyüsehnung, hütsüpü du lithroti apümnü nyitsarü müipi lümcho müdhebong tsü Ih-epü müdhenung. Ihnü nührü nyitsarü müipi khyang palu nguchi aleng jünung.

²⁴ “Ta Thyatira la nührü anyingchoti nülü hiba amünyi adoba mü-iiwü; bürünü ‘Motsing asoh lümlong’ pü dsiba tsü nührünü mühnyicho. Nührü khyang bhamüling alaa müjünung Ihnü nührü te yore.

²⁵ Ta Ih müro yingcheh nührü tu liro hütsü yümpung.

²⁶ Akohrüti sürünü achangchi I lümcho nguchiro, arüh khyang Ihnü I U chahnü khyüchoba suhre tsü jünung.

²⁷ Yuchoti michah idhse janü yangthsathsanung ko alihfüh roh-i zangzang kengnahnung Ihnü arüh khyang tase jünung.

²⁸ Ihnü arüh khyang anyangnyü pütisü jünung.

²⁹ “Lithroti te Anbünü tu yoro, nührü nangku kehkhang nyieng!