MISHACHO 17 - AMÜSA BAIBEL (BSI)

Anengkhong Nahtrahnaxenglatpü

¹ Hütsüpü tbhü dhünyeh biba ninglang riwürü dhünyeh yola khüdunü Ite ro yocho, “Rung ko Ihnü yongkhi adrong shündhün thsaba yangdi amülah nahtrahnaxenglatpü tsü khüta khingchinungnang nüte yonung.

² Limih yangthsarütinü abükyü te nahtrahnaxengcho, ko abükyü mabomashi yongkha yongchonü limih nyitsarüti müchacho.”

³ Anbünü Ih jengcho, ko riwürü tsünü Ih lipilih lang nowücho. Hütsüla khingkurü khüdu Tsingrangba müthsamünyünü jeng thrahkehpü kangdi amoh khüdu chah püm Ihnü ngucho; kangdi tsü athah dhünyeh ko ajüh dhüre kehcho.

⁴ Khingkutpü tsü anyahrüm ko amoh jengki, hon, thsidilung ko bhürümnü jeng khyücho. Akheh la abükyü mabomashicho athrünyinung ko amümüsa kohronü jengba hon shing khüdu licho.

⁵ Akikhang chah arangyu aneng khüdu thrahkeh licho: “Arangcheh Babylon, limih la amümüsa ko nahtrahnaxengrü atümung atpa.”

⁶ Ko hiba khingkutpü tsü amüsarü shüh ko Jisu khanglang iiwücho ngang müpsehcho shühnü müchapü Ihnü ngucho. Abükyü ngude, I dee nyemüyangcho.

⁷ Ninglang riwürünü Ite tsingdhingcho, “Nüh tuepü nyemüyangro? Khingkutpü, hiba athah dhünyeh ko ajüh dhüre kehba kangdi ko khingkutpü arangyu neng adüzü Ihnü nüte yonung.

⁸ Hiba kangdi tsü khüdupi akang licho ta ade akang mühle; hütsü jongnah müliba shukuh lanü chüro achangnung lang wünung thsako. Limih la lirü sürü limih thridenü akang vakhala thrah müliro, arüh atümungnü hiba kangdi ngude nyemüyangnung. Hütsü khüdupi akang licho; ade mühle, ta thali ronung.

⁹ “Hi nengdang lümlong ko amüdhe dhsütahre. Athah dhünyeh tsü khingkutpü pümba akhang dhünyeh tsü lile. Arüh tsü yangthsarü dhünyehsü lile:

¹⁰ Arüh münga khüluko, khüdu ade yingcheh yangthsale, ko apa khüdu tsü ade müroe; khode abi ronang, abinü azachah du yangthsanung.

¹¹ Ko khüdupi lipü adelü müliba kangdi abi tsü akeh-uba yangthsaba, sü dhünyeh yola khüdu ko achangnung tsiyaba tsü lile.

¹² “Ko nühnü nguba ajüh dhüre tsü ade yangthsanung müdikeh-eba yangthsarü dhüre lile, ta arüh khyang kangdi yola rehtseh khüdu yangthsanung tase jünung.

¹³ Hiri dhüreding tsü alümcho khüdu du lile, ko arühnü zii ko tase tsü kangdi khyang jüre.

¹⁴ Arühnü Sanza nyüm khatanung, ta atsirüti, athrochehrüti ko longlangchehrüti zeh Sanzanü kohnung, tunüo abi tsü abüdongrü michah Abüdongba ko yangthsarü michah Yangthsabong.”

¹⁵ Ninglang riwürü tsünü Ite yocho, “Nühnü nguba kih khüi michah nahtrahnaxenglatpü pümro, arüh tsü yanglih nyitsarü, ahung ko yuchoti lile.

¹⁶ Nühnü nguba ajüh dhüre ko kangdi tsünü nahtrahnaxeng latpü tsü thrünyinung; arühnü abükyü licho lüpcho hitsijünung ko tbhüdeng pehjünung; arühnü abükyü shuh tsunung ko michangnü abükyü trüp-pehnung.

¹⁷ Tunüo Tsingrangba yu mütikeh-ede, arühnü müjang abi lümcho hitsinung, ko kangdi khyang yangthsanung arüh zii jünung Tsingrangba-nü arüh lasih la yohjünung.

¹⁸ “Nühnü nguba khingkutpü tsü limih yangthsarüti michah yangthsatpü yangdi arangcheh tsü lile.”