MISHACHO 13 - AMÜSA BAIBEL (BSI)

Kangdi Anyüh

¹ Hütsüpü kihdi lanü kangdi khüdu chürochi Ihnü ngucho. Hütsü chah ajüh dhüre ko athah dhünyeh kehcho; ko ajüh müipi chah yangthsarü kuthri kehcho, ko athah müipi chah Tsingrangba müthsamünyüba aneng khüdu-khüdu kehcho.

² Kangdi tsü adhingnung khünying kyo, ajing shühmü jing kyo ko abe kihkhünying be kyo licho. Dragon tsünü kangdi khyang tsü apu zii, apu pümji ko apu tase apüm jücho.

³ Kangdi thah yola khüdu mütsa dhsakehpü ngucho, ta madhsa tsü kyangpü licho. Liküprünü nyemüyang hütsüba kangdi khanglang wücho.

⁴ Atümungnü dragon tsü mübücho tunüo abinü kangdi khyang apu tase jücho. Arühnü hita cho kangdi tsü mübücho, “Kangdi kyo sü liro? Abi te sünü khatachehnung?”

⁵ Kangdi khyang tsü Tsingrangba müthsamünyü müthsehnung, ko choo yürepü anyüh abi khyang tase bichinung mülajücho.

⁶ Abinü Tsingrangba ko abi neng, abi lichah ko ninglang yanglih la lirüti atümung chokehcholanung dikehcho.

⁷ Tsingrangba nyitsarüti nyüm khatanung ko arüh kohnung abi khyang mülajücho, ko ahung, limih, yucho ko atrah müipi tase jücho.

⁸ Amüpsehba San yo akang vakhala limih müthrie denü aneng thrah lirü chah khu, limih chah lirü nyitsarü atümungnü hütsü mübünung.

⁹ “Nührü nangku kehkhang nyieng!

¹⁰ Sü rangnung licho abi yuje rangnung; sü nohshengnü kyüsehnung licho abi yuje kyüsehnung. Hinü Tsingrangba nyitsarüti nengdang arangcho ko yudsi khangre.”

¹¹ Hütsüpü Ihnü kangdi apa khüdu alih lanü chürochi ngucho. Hütsü chah Sanza jüh kyo anyüh kehcho, ko dragon kyo chocho.

¹² Abinü akhudiba kangdi tase apüm abi linü bichicho. Abinü iha kyangba kanglungrü tsü limih ko hütsüla liba atümung khyang mübüsohcho.

¹³ Hiba anyüuba kangdinü thsayahiya amülah nguchicho; abinü atümung bete ninglangnü limih chah michang jürosohcho.

¹⁴ Ko akhudiba kangdi bete nguchinung mülaba thsayahiya khunü limih chah lirü atümung thsüyohchücho. Kangdi tsünü arüh te nohshengnü dhsakehjüpü liba kangdi nengla kyothri khüdu thrinung yocho.

¹⁵ Kyothri tsünü chotachehnung ko hütsü mümübürü atümung süsohnung nengdang, anyüuba kangdi khyang akhuba kangdi kyothri chah tsü akang sah mehyohjünung mülacho.

¹⁶ Kangdi tsünü aikyah ko amülah, alirü ko ailümrü, ayurü ko nyüje nyitsarü atümung kheh tsalang mahkhang kikhang chah amüdhethsa shingkehsohcho.

¹⁷ Hiba amüdhethsa kangdi neng mahkhang hütsü neng mülih shikhi mükehkhang, sünüsü lihnung mahkhang inung mükohnung.

¹⁸ Hi nengdang lümlong dhsütahre. Sü thsehdhsaro abinü kangdi shikhi adüzü tsü rangchehnung, tunüo shikhi tsü nyüh khüdu neng müli yare. Hiba shikhi tsü 666.