MISHACHO 12 - AMÜSA BAIBEL (BSI)

Khingkurü ko Dragon

¹ Hütsüde ningchah amüdhethsa arangcheh khüdu chürocho. Khingkurü khüdu nyü müpipü, chonu tsü abükyü jing pohki yohpüpü ko athahchah chenghi dhüreanyüh kuthri khüdu thripü licho.

² Abükyü tsü akhunga zatbünung bekhyah chihcho, ko zatbünung mikhung ko chongcha tsünü abükyü tsü trasohcho.

³ Ning chah apa amüdhethsa khüdu chürocho. Athah dhünyeh ko ajüh dhünyeh kehpü ko athah müipi chah kuthri thripü dragon amoh arangcheh khüdu licho.

⁴ Amüyingnü ningchah chenghi chang asangla khüdu tphah hiropü limih chah longsohcho. Ko akhunga tsü zatbüyeng tsunung abinü khingkutpü bete yacho.

⁵ Hütsüde, limih apüm michah idhse janü yangthsanung abükyünü dhrezarü khüdu nümüsucho. Ta azarü tsü Tsingrangba ko abi pümji yang rohcho nükeh tsicho.

⁶ Ko khingkutpü tsü nyümong 1, 260 chii xükümnung Tsingrangba-nü müdüm khüdu rungnüm yohpüjücho lipilih yang tsicho.

⁷ Hütsüde ninglang yanglih la khata suwücho. Maikal ko abi riwürütinü dragon nyüm yacho, ko dragon ko abi riwürütinüsü khatacho;

⁸ ta dragon tsü kohchehcho, ko abi riwürüti tsü ninglang yanglih la linung mümülacho.

⁹ Liküp thsüyohchüba ahi mürü, motsing mahkhang Satan dsiba dragon arangcheh tsü iichahchücho. Abi ko abi riwürüti atümung limih lang iichahchücho.

¹⁰ Hütsüde ninglangnü yuva amülah khüdunü yo Ihnü yuchicho, “Ade Tsingrangba akangcheh tsü roko! Ade yangthsarü kyo Tsingrangba-nü abi zii ngusohko! Ade abi Mesia-nü abi tase ngusohko! Tunüo Ihsa Tsingrang bete yapü ama atsingse Ihsa jünirüti mülangjübong tsü ninglang yanglih lanü iipehko.

¹¹ Ko arühnü Sanza shüh ko arühnü sobhoba yuje tsünü abi kohko: ko arühnü arüh akang jünung ko sünung mii khyangcho.

¹² Hütsünü, O ning ko hütsüla lirüti, nührü künyang! Ta limih ko kihdi nengdang khütoh-i adrünung! Tunüo nührü yanglang motsing jüroko, ko abi shikhe akhikyah duepü müdhe, abi dee rihlong chüro lile.”

¹³ Khode dragon-nü abi limih chah iipehkopü müdhecho, adhrerü khüdu surojüba khingkutpü tsü kihchonung müküpcho.

¹⁴ Ta lipilih lang abükyü alichah khüde dragon kheh lanü khümcho kang asangpü achangsho linung, hütsü yang mong tsinung nengdang abükyü khyang müdi amülah qo anyüh jücho.

¹⁵ Hütsüde abükyü müyeh tsisohnung nengdang abükyü khanglang dragon-nü abe lanü kihmülüm pohchehsohcho.

¹⁶ Ta alihnü khingkutpü tsü trocho; abinü abe kacho ko dragon be lanü pohchehba kih tsü münyücho.

¹⁷ Dragon-nü khingkutpü te zichüronü abükyü chahnü trahchocho Tsingrangba yuzeng bichirüti ko Jisu-nü mishaba la yuje cho lirüti nyüm khatanung wücho.

¹⁸ Ko dragon tsü kihdi bekhüm la yacho.