MISHACHO 11 - AMÜSA BAIBEL (BSI)

Yuzi Anyüh

¹ Hütsüpü I khyang akihsing xuyang khüdu jünü yocho, “Wüng ko Tsingrangba amübükuh ko bholu tsü kihng, ko amübükuh la mübürüti khidhing.

² Ta dongkhu tsü tükih, tunüo choo yürepü anyüh Amüsa yangdi tsü dhrümchinung nengdang hütsü yangpirü khyang jopehko.

³ Ihnü I yuzithsarü nyüh anyüh müyahshü müpipü müthehnung, ko arühnü hütsüri 1, 260 nyümongla tsü Tsingrangba yu sobhonung.”

⁴ Yuzi anyüh tsü limih Abüdongba bete yaba olive singdong anyüh, ko dsimüdongsing anyüh tsü lile.

⁵ Khürünü arüh dhsakehjünung müküpkhang, arüh be lanü michang chüro arüh rorüti changjüre; hütsüta arüh thsakehjünung müküprü tsü müpsehnung.

⁶ Arühnü Tsingrangba yu sobho bekhyah tsing mürosohnung ning khangtinungsü arüh chah zii kehle. Kihnü ashüh kangsohnung, ko arühnü lümde limih chah wara masünü chihsohnungsü arüh chah zii kehle.

⁷ Arühnü thsingyukade, ajongnah müliba lanü chüroba kanglungrü tsünü arüh nyüm khatanung. Abinü arüh kohnung ko arüh müpsehnung,

⁸ ko arüh me tsü arüh Abüdongba hamkehba yangdi tungte la tsü jonung. Hütsüba yangdi neng adüzü tsü Sodom mahkhang Ijip linung.

⁹ Ko limih, ahung, yucho, ko atrah apüm lanü arüh me tsü nyümong asangpü achangsho dhingnung ko arüh me rangnung mümülanung.

¹⁰ Hütsünyi sücho nengdang limih nyitsarüti künyangnung. Arühnü jiyü jüta künyangtanung, tunüo azikehrü hütsünyinü amüi tsurü khütang chongchasohko.

¹¹ Nyümong asangpü achangsho khanglang Tsingrangba chahnü akang sah arüh chah züducho, ko arühnü yacho; ko hütsü ngurü atümung drüpehcho.

¹² Hütsüde azikehba nyüh tsünü ninglangnü anyüh te yuva amülahnü, “Hila kürung” pü yo yuchicho. Arüh rorütinü dhingyade, nyükhi la arüh ninglang tuwücho.

¹³ Hütsüde alihyo atrehdi zingcho; yangdi tsü changsho dhüre la khüdu changcho, ko nyitsarü hajar dhünyeh müpsehcho. Anyingcho nyitsarütinü drüseh ninglangrü Tsingrang dicho nengdang secho.

¹⁴ Adrünung anyüuba tsü khuko, ta adrünung asanguba tsü zah ronung!

Adhünyeh-uba Rühti

¹⁵ Hütsüpü dhünyeh-uba ninglang riwürü tsünü abi rühti mehcho ko ninglangnü yuva amülahnü yocho, “Limih yangthsanung tase tsü adelü Ihsa Abüdongba ko abi Mesia khyang jüko, ko abinü müchangkapü yangthsanung!”

¹⁶ Hütsüde Tsingrangba bete pümrü azibarü mükyüpü müyü tsünü mükhukeh Tsingrangba mübü

¹⁷ yocho: “Ade ko atsiba la liba, Akohba Abüdongba Tsingrang! Nühnü zii amülah khyo yangthsanung dikehchonü nüh sere!

¹⁸ Nü rihlongchüroba becho chihchonü, ko asürüti yukhanung becho chihchonü, müyudsirüti zichürore. Nü dikehrüti, azikehrüti ko nü mübürü atümung, nü jengreng drürüti amülah ko azikyah, jiyünung becho chihko. Limih changjürüti changsohnung becho chihko!”

¹⁹ Ninglang Tsingrangba amübükuh khangthrucho, ko azengchotacho singdi tsü hütsüla ngucho. Hütsüde ningmüla, ningki yuva rengreng alihyo ko shurü khütang sühcho.