MISHACHO 10 - AMÜSA BAIBEL (BSI)

Ninglang Riwürü ko Thrahlohcho Azikyah

¹ Hütsüpü ninglang yanglih lanü apa akohba riwürü khüdu jürochi Ihnü ngucho. Abi nyükhinü lohtipü ko mürükengkengnü athah kengticho; aromih nyü roh-i, ko ajing michang dongdi roh-i licho.

² Abi kheh la thrahlohcho azikyah khüdu khangthru licho. Abi tsalang jing kihdi la ko fülilang jing alih akung la drangrang licho,

³ ko kihkhünyingnü khongcho kyo abinü yuva amülahnü züdecho. Ko abinü züdede, ningki dhünyehnü lalingcho.

⁴ Arühnü choyeng Ihnü thrahnung yacho, ta ninglangnü yuva khüdunü cho Ihnü yuchicho, “Ningki dhünyehnü yoba tsü rang yohpüng; hütsü tüthrah!”

⁵ Hütsüpü Ihnü nguba kihdi ko akung la yaba ninglang riwürü tsünü akheh tsalang dhimüsu,

⁶ ning, alih kihdi ko hütsüla liba lüpcho thribong, sü müchangkapü lidu libong Tsingrang nengla yuchüm yocho, “Adelü mümünunung!

⁷ Ta khode ninglang riwürü dhünyeh-ubanü abi rühti mehnang, Tsingrangba-nü abi dikehrü azirüti te müdhesohcho kyo abi arang lümchung thümnung.”

⁸ Hütsüde ninglangnü cho Ihnü yuchiba yuva tsünü Ite thali chota yocho, “Wüng ko kihdi la ko alih akung la yaba riwürü kheh la tsünü khangthru liba thrahlohcho tsü khyüng.”

⁹ Ihnü ninglang riwürü yanglang wünü thrahlohcho azikyah tsü I khyang jüng pü tsingdhingcho. Abinü Ite yocho, “Khyüng ko tsung; hütsü nü mi la aci kangnung, ta nü be la thsakukih kyo nyiyahnung.”

¹⁰ Ihnü abi kheh lanü thrahlohcho azikyah tsü khyücho ko tsucho, ko I be la hütsü thsakukih kyo nyiyahcho. Ta Ihnü hütsü münyüde, I mi la aci kangcho.

¹¹ Hütsüpü Ite yocho, “Adesü nühnü limih, atrah, yucho ko yangthsarüti te Tsingrangba yusi sobhoung.”